5-нчи июльда Къаягент районну башчысы Магьаммат Элдерханов ва билим берив управлениени ёлбашчысы Мурат Рашитов охув йылны оьр къыйматлагъа битгенлеге алтын медаллар тапшурду.
–11 класны охуп битген яшлардан 23-вюне алтын медаль бериле, – дей, яшланы къутлай туруп, М.Элдерханов. – Бек яхшы натижа. Энниден сонг да сиз шулай къаст этип охув ожакъланы да битме ва районугъузгъа къайтып жаваплы ишлерде ишлеме насип болсун. Сиз бизин гележегибизсиз, алтын хазнабызсыз.
Яшлар да, оланы ата-аналары да билим алма имканлыкълар яратылгъаны учун гьакимиятгъа, билим берив управлениеге баракалла билдирди. Эсделик сурат алдырып битгенден сонг да яшлар яйылып битмей шайлы заман турдулар, неге тюгюл олар бир-бирин узакъ заман гёрмей турма бола.
