Рамис Гьажимуратовгъа 8 йыл бола. Ол Бабаюртда Ренатны ва Зулейханы агьлюсюнде тувгъан. Мунда тувса да, ол агьлю шартлагъа гёре гиччи заманындан тутуп Санкт-Петербург шагьарда оьсген. Ону макъамлагъа, йыргъа-сарынгъа пагьмусу барны яшлар бавунда гьис этгенлер.

 

Ол шагьардагъы «Светлячок» деген яшлар бавунда гиччипавлар булан бирче йырлама башлагъан. Яшлар баву шагьарны Адмиралтейское деген районунда ерлешген. Шагьарда оьтгерилген «Нева оьзенни макъамлары» деген конкурсда бу яшлар баву биринчи ерни алгъанында Рамисни де къошуму бар.

Яшлар бавунда ишлейген музыка дарсланы муаллими Лариса Рудольфовна пагьмулу Рамисни бары да конкурслагъа, байрам шатлыкъ-лагъа, концерт программалагъа генг кюйде къуршай. Яшлар баву булан савболлашагъанда муаллим Рамисни ата-анасына пагьмулу яшны тар-биялагъаны учун разилик билдирип, баракалла кагъыз тапшургъан ва яшны музыка школагъа охума салма таклиф этген.

Ата-анасы шо таклифни къабул этип, Рамисни шагьарда М.И. Глинканы атындагъы хор училищеге элтген. Гючлю конкурс болса да, пагьмулу яш конкурсдан ­оьтюп, дюньягъа аты айтылгъан бу училищеге охума тюшген. Биринчи курсда охуйгъан Рамис училищеде оьтгерилеген гьар тюрлю конкурсларда, байрам гюнлеге багъышлангъан концертлерде актив кюйде ортакъчылыкъ эте.

Рамисни музыкадан клас ёлбашчысы Василий Грачёв ону пагьмусуна мюкюр ва макътав сёзлер айта. Пагьмулу яш биринчи класны гьюрметлев грамоталар, дипломлар булан битдирген. Дагъыстанлы къумукъ яшны ­уьстюнлюклери бизин де сююндюрмей болмай. Бугюнлерде Рамис уллатасы, улланасы яшайгъан Бабаюртгъа къонакълай гелген. Огъар уллу сагьналарда оьзюню пагьмусун гёрсетме насип болсун деп айтма сюемен.

 

Б. ГЬАЖИГЕЛДИЕВА.

СУРАТДА: Р. ГЬАЖИМУРАТОВ.