Дюнья сынаву аянлашдырагъаны йимик, туристлер оьзлени билимлерин камиллешдирмеге, ял алмагъа онгайлы къуллукълар яратылынгъан бойланы ахтара ва танглай. Артдагъы, дёрт-беш йылланы ичинде – Россияны оьзге регионларындан ва шолай да башгъа уьлкелерден Дагъыстангъа къонакълай гелеген туристлени санаву 1 миллионгъа къолайлашгъан.
ДР-ни туризм ва халкъ чебер саниятларыны министерлиги токъташдырагъан кюйде, 2023-нчю йылда тышдан гелеген туристлени санаву алдагъы йылдан эсе дагъы да 40 процентге кёп болду. Шону гьисапгъа алып, муниципал къурулувларындан оьтеген «Дагъыстанны 100 аламаты!» деген турист маршрутда гьар тюрлю онгайлы къуллукълар болдурула.
– Гюз-йылны лап да берекетли ва гёзел вакътиси, – дей эсгерилген министерликни башчысы Эмин Мерданов. –Гьаракатгъа-берекет деген кюйде, загьмат йылны гьасиллери чыгъарыла ва гёрмекли натижаланы гьюрметине башгъа-башгъа милли байрам чаралар оьтгериле. Милли опуракълар, мердешлер, саниятлар, ашлар аян этилине. Табиатны гьава шартлары да «алтын гюзде» ерли адамланы йимик тышдан гелегенлени де иштагьландыра, гёнгюн ача. Шону булан дазуланмайлы, туристлени къабул этеген уьйлени санаву къолайлашагъаны, этилинеген къуллукъланы даражасы гётерилегени ва багьалары тёбенлешегени гьакъда да разилик булан эсгермеге бажарыла. Темиркъазыкъ-Кавказ федерал округунда Дагъыстан туризмни оьсювню ёлунда экени гележек учун инамлыкъны тувдура.
Россияны Президенти Владимир Путинни сиптечилиги булан 2022-нчи йылдан тутуп, ич туризмни оьсдюрювге ерлерде берилеген тергев артып тербей. Къуллукъланы артдырыв булан янаша оланы сан янына да тергев берилмеге тюшегени гьакъда унутмагъа ярамай.
Пачалыкъ маълумат берив булан машгъул болагъан федерал къуллугъуну Дагъыстанда иш гёреген управлениеси билдиреген кюйде, бу йылны сентябр айындан тутуп, тыш туризмни къуллукълары къоллавчулагъа багьа олтура. Дагъы да ачыкъ этип айтсакъ, Бирлешген Арап Эмиратларда, Тюркияда ва Египетде багьалар 20-25 процентлеге гётерилген.
Айтмагъа сюегенибиз, туриндустрияны къуллукъларын артдырыв ва сан янын камиллешдирив учун юрюлеген ярышда багьалар да бир кюйде турмай, айлана якъдагъы талаплар алышынгъан сайын гётерилмеге бола. Амма Россияда йыракъ чакъырымлагъа юрюйген поездлени ва шолай да учагъан самолётланы билетлери 15-20 процентлеге тёбенлешгени ич туризмни оьсдюрювге имканлыкълар ярата. Тек не этерсен, шону булан янаша регионланы шагьарларыны арасында юрюйген пассажир транспортну багьалары гётерилегени айлана ягъыбызда разисизликлени тувдура.
Къ. КЪАЗАКЪМУРЗАЕВ.
