Абидат Атаева Бабаюртда 1938-нчи йылда кёп яшлы агьлюде тувгъан. Олар дёрт къызардаш ва бир уланкъардаш болгъан.
Абидатны атасы Агъай муаллимлик касбугъа охугъан буса да, кёп йыллар юртда колхозну председатели болуп ишлеген. Уллу Ватан дав башлангъанда, давну биринчи гюнлеринде Агъай Атаев, оьзгелеге де уьлгю гёрсетип, Ватанны якълама гёнгюллю кюйде фронтгъа гетген. 1943-нчю йыл буланы уьюне къайгъылы хабар гелтире. Агъай Атаев оьзюне 35 йыл болагъан чагъында гючлю давларда ябушув юрюте туруп, Ватан учун жанын къурбан этген. Гелген кагъызда буса «белгисиз тас болгъан» деп билдирилген. Агъайны биргине-бир уланы Атай да немис елевчюлерден атасы учун оьч алма 1944-нчю йылда фронтгъа гёнгюллю гете.
Атай давдан сонггъу йылларда да халкъ хозяйствону аякъгъа тургъузувда къайратлы загьмат тёгюп чалышгъан. Ол 1994-нчю йылда давда алгъан яралары оьрчюп гечинген.
Абидат дав ва давдан сонггъу йылларда кёп къыйынлыкълар гёре, тек ругьдан тюшмей яшай. Тувулунгъан къыйынлыкълагъа да къарамайлы, Абидатны анасы авлетлерине хас орта ва оьр билимлер берме бажаргъан. Бугюн де авлетлери анасыны оьзлеге тёкген къыйынларын англай ва уллу гьюрмет булан ону атын эсгерелер.
Абидат юртдагъы школаны битдирген сонг, Дагъыстан пачалыкъ университетни филология факультетине охума тюше ва шо эсгерилген охув идараны уьстюнлю битдире.
Яш муаллимни 1960-нчы йылда Бабаюртдагъы орта школагъа ишге бакъдыра. Шонда дёрт йыл ишлей. Шо йылларда ол оьзюню къысматын хасавюртлу муаллим Арслан Гьюсейнович Маликов булан байлай.
Арслан Маликов шагьардагъы 1 номерли школаны «бешге» бите ва 1957-нчи йылда Дагъыстан пачалыкъ университетни физика-математика факультетине охума тюше. 1963-нчю йыл яш муаллимни 14 номерли школагъа, сонг артындагъы йыл ону 3 номерли школагъа ишлеме йибере. Ол шо школада 31 йыл ишлей, шагьарда биринчилей болуп Россияны Президентини грантын алгъан, РСФСР-ни билим беривюню отличниги.
1995-нчи йылдан берли, Арслан Гьюсейнович Алевдин Абуковну атындагъы кёп профилли лицейде ишлей. Бу йыл Арслан учун «гелимли ва бай» йыл. Огъар 75 йыл бите. Шондан 50 йылын ол яшлагъа билим беривге багъышлагъан. Арслан Гьюсейнович ва Абидат Агъаевнаны бирге загьмат стажы 100 йылдан да оьте.
2000-нчи йылдан тутуп, бугюнлеге ерли А.Атаева оьзюню пенсия чагъына да къарамайлы, шагьардагъы лицейде муаллим касбусун юрюте. Абидат Агъаевна шагьарда лап да яхшы муаллимлерден бириси санала.
Ол охутгъан охувчулар яшавда гьариси оьз ерин табып, гёрмекли адамлар болгъанлар. Демек, мисал учун айтгъанда, школаны алтын медальгъа битдирген Найиля Асанова шагьардагъы музыка школада дарс бере. Элмира Девлетбиева да – муаллим, Курган областда яшай ва шондагъы школаланы бирисинде директор болуп ишлей, Мадина Устарханова экономист касбугъа ес болгъан. Абидат Агъаевна 53 йылны узагъына охутгъан яшланы санаву эпсиз кёп. Оланы кёбюсю, чола болгъан сайын, сююмлю муаллимин гёрме гелелер.
Абидат Атаева яш йылларын эсгерип, булай хабарлай:
–Адам яш йылларда не этип де къоя. Мен студент йылларымда (шо 1957–58-нчи йыллар боладыр) Къазахстанда Семиозёрный районну Тимофеевка посёлогунда тынлыкъны (целинаны) гётеривде ортакъчылыкъ этдим, шонда эки керен болмагъа тюшдю, – дей ол. – Биз шонда коллективликге, дослукъну юрютме уьйрендик. Гьали яшланы бирикдиреген шолай чаралар осал юрюле. Шо заманларда ишге барагъанда да, арыгъан бусакъ да, къайтагъанда да йырлай туруп геле эдик. Биревню къыйынына шоссагьат табыла эдик. Яшларда охувгъа бакъгъан якъда гьасиретлик сёне бара. Шо мени бек талчыкъдыра.
Олар яхшы мауллимлер экени йимик, яхшы ата-ана да дюр. Айтагъаныкъ, бир улан, эки къыз оьсдюргенлер ва олагъа яхшы тарбия да берип, оьр билимлер алдыргъан.
Къызы Элмира Хасавюрт райондагъы халкъны социальный якъдан якълайгъан управлениени бёлюгюню башчысыны орунбасары болуп чалыша. Экинчи къызы Земфира – районара налог инспекцияда бёлюкню башчысыны орунбасары. Уланы Мурат да – художник.
Сав оьмюрюн яшлагъа билим берме багъышлагъан Абидат Агъаевна бугюнде де тарыкълы. Ону дарс берме лицейге чакъыргъаны да негьакъ тюгюл. Ол дарсны тындырыкълы англата, ингдеси, ол яшланы, яшлар буса ону кёп сюе. Яш муаллимлер де огъар ошама къаст эте.
СУРАТДА: Абидат Агъаевна агьлюсю Арслан Гьюсейнович булан.
Гебек КЪОНАКЪБИЕВ,
оьз мухбирибиз.
