Къызылюрт шагьарда сокъурланы Бютюнроссия жамиятыны ерли къурумуну янында гьаракатчылыгъын гёрсетегенлер де бар. Тюзюн айтсам, Асият Гьасанова шолардан бириси гьисаплана. Асият гьар заманда да бу къурумну янында оьтгерилеген чараланы авур янын оьз бойнуна алып, сёз булан да, иши булан да гелишип болагъан адам.

 Бу ерде шулай бир затны гьакъында айрыча эсгерме сюемен. Сокъурлар жамиятны арасында къысылып, тартынып дегенлей, оьз ерин тапмаса да, олар онгача жыйылгъанда оланы башгъалардан айырып да болмайсан деп эсиме геле. Аргъаны, къомуз-теби булан дегенлей олар этеген аз заманлыкъ шатлыкъ да юрегинге балгьам болуп токътай. Шо – оланы дюньясы, оьзлер жыйылгъанда музыкалы инструментлени согъуп, бир-бирине такъмакълар айтып, гёнгюн алса, ­огъар тиеген зат болмас деп ойлашаман.

Биз оьзюню гьакъында лакъыр юрютеген Асият буса, сокъурланы гьалын-гюнюн сорап, ахтарып къоймай, оланы гьарисине онгача янаша. Асият къошулмайлы, сокъурланы ерли къурумуну янында бир чара да, бир иш де юрюлмей. Олар да ону геливюн чыдамсыз къаравуллай.

Артдагъы гезик юрюлген гьаракатда да, Асият сокъурланы ерли къурумуну ишине тюз багьа бергенден къайры да, оьз пикрусун айтды. Демек, энниден сонг да ерли къурумуну иши жанлы гьалда юрюлежегине бир де шеклик тувулунмай.

Озокъда, Асият сокъурланы Бютюнроссия жамиятыны тарихине гёре байлавлу оьтгерген викторинаны жамын чыгъарагъанда да, тюз жавап берип ортакъчылыкъ этгенлени гьарисини атын эсгерип, олагъа айтгъан исси сёзлери де балгьам болуп токътагъандыр. Шогъар тиеген не болур дагъы?!

Энниден сонг да Асиятгъа оьз гьаракатын болдурувда дагъы да уьс­тюнлюклер ёрайбыз.