Уьлкебизни оьзге регионларында йимик, Дагъыстанда да йылны ахырында яшавлукъ-экономика тармакъда этилинген натижалар гёзден гечириле ва гележекге байлавлу болуп янгы борч­лар къабул этилине.

Дагъыстан Россияда аграр республика гьисапда танывлу. Бугюнлерде ДР-ни юрт хозяйство ва сурсат министри Мухтарбий Ажеков «Дагъыс­тан» деген республика маълумат агентлигинде пачалыкъ маълумат къуралланы къуллукъчуларына къоллавчулар учун тармакъдагъы борчланы яшавгъа чыгъарылывуна байлавлу толу кюйде баянлыкъ берди.

– Айлана якъда тувулунгъан гьар тюрлю четим гьаллагъа бойсынмайлы, бизин республикабызны агропромышленный комплексини къуллукъчулары халкъны ва пачалыкъны сурсат аманлыгъы учун юрюлеген гьаракатда ла­йыкълы къошумун болдура, – деди ол оьзюню баянында. – Бугюнлерде Дагъыстанны Башчысы Сергей Меликов да ­Москвада РФ-ни Федерация Советини Председатели Валентина Матвиенко булан болгъан ёлугъувунда да айрыча маълумат берди.

Гертиден де, 2022-нчи йылда бизин республикабызны агро-промышленный тармагъы гёрмекли уьстюнлюклеге етишди. Дагъы да ачыкъ этип айтсакъ, юзюмлюклени тюшюм береген майданларындан 268,5 минг тон татли емиш, чалтик ­чеклерден 138 минг тон акъ бюртюк къайтарылды. Авлакъ ниъматланы: овощланы, емишлени оьсдюрювде де натижалар йыл сайын къолайлаша геле. Гьайванчылыкъ тармакъда болдурулагъан этни ва акъкъатыкъланы къадары, сан яны да къоллавчуланы рази къалдыра. Шону бизин республикабызда ва ондан тышда оьтгерилеген ярмакю-выставкаларда дагъыстанлылар гьар тюрлю савгъатларына ес болагъаны да ачыкъдан ташдыра.

Пресконференцияны барышында Мухтарбий Къошманбетович журналистлер берген соравлагъа жаваплар къайтарды. Шо гьакъда «Ёлдашны» гелеген номерлеринде генг кюйде маълумат берме умут этиле.