Сорав – жавап
– Асгерге язбашгъы чакъырыв башлангъан. Шо чара къачан болгъанча юрюле ва нече йыл болгъанча ала?
–Язбашгъы асгерге чакъырыв 1-нчи апрелде башланып, 15- нчи июль болгъанча узатылажакъ. Шо гьакъда Россияны Президенти Владимир Путинни Указы да чыкъды.
Асгерге чакъырыв алдагъы кюйде сакълангъан: 18–27 йылланы арасындагъылар алынажакъ.
Президентни Указына гёре, асгерге язбашгъы чакъырывда армиягъа 147 минг адам чакъырылажакъ, шоланы бириси де хас асгер агьвалатда ортакъчылыкъ этмежек. Олар Россияны МЧС-ини, Милли гвардиясыны ва Савутлу Гючлерини сыдраларында 1 йыл къуллукъ этежеклер.
Гьар военкоматдагъы комиссия гьар яшны документлерине къарай ва барма тарыгъын токъташдыра. Авруйгъанлагъа, оьр охув ожакъда охуйгъанлагъа, яшлары барлагъа да комиссия къарай ва асгерге йиберилегенин яда йиберилмейгенин токъташдыра.
* * *
– Президентни, Россияны билим беривюню жаваплы къуллукъчуларыны сёйлевлеринде 2023-нчю йылда муаллимлер гьазирлейген оьр охув ожакъларда студентлеге гьавайын ерлер артажакъ деп айтыла…
–Артдагъы йылларда муаллим болма сюегенлени санаву кемий бара. Бир-бир школаларда 4-5 тюрлю дарсланы муаллимлери етишмей. Шону учун да охума сюегенлеге гьавайын ерлер гёрсетилген. Россияны билим берив министрини орунбасары Татьяна Васильева билдиреген кюйде, яшёрюмлер учун оьр охув ожакъларда 75,5 минг бюджет ерлер болажакъ, шолардан 35,5 минги – муаллимлер гьазирлейген оьр охув ожакъларда.
* * *
– Россиягъа билдирилген къысаслыкълагъа гёре, тыш пачалыкъланы дарманларыны гелегени токътатылгъан. Аврувлагъа тарыкъ дарманланы бизин уьлкебизде чыгъарамы?
– Алда дарманланы яртысындан да къолайы тыш пачалыкълардан гелтириле эди. Россияны савлукъ сакълав министерлигинден билдиреген кюйде, гьали дарманланы 70 проценти бизде чыгъа.
– Оьзюбюзню дарманларыбызны чыгъарыв башлангъанлы 5-6 йыллар да бола, – деп билдире савлукъ сакълав министерликни жаваплы къуллукъчусу.
* * *
– Артдагъы йылларда адамланы яшавлукъ къуллукъларын кютегенлени санаву кёп болуп тура. Къуллукъ тарыкълылар нечик токъташдырыла?
–Яшавлукъ къуллукъ тарыкъ деп медицина документлеге гёре халкъны яшавлукъ гьалларына къарайгъан управлениени къуллукъчулары токъ-ташдыра.
Эгер де адам оьзю оьзюню къуллугъун кютюп яда юрюп болмай буса, шогъар къарайгъан адам салына.
Агьлюде къарав тарыкъ сакъат яда къаюмгъа алынгъан авруйгъан яш бар буса, шогъар реабилитация тарыкълылар да яшавлукъ къуллукъ этме гереклилени гьисабына гире.
Эгер де ата-анасы ичкичилер болуп яда бир башгъа гьаллагъа гёре яшланы къаравсуз къойгъан, оланы яшавуна къоркъунчлукъ буса, шолайлар да яшавлукъ якълавну тюбюне тюше.
Яшавлукъ гьаллары бек бузукъ адам да яшавлукъ къуллугъун кютегенлени тергевюнде бола.
