Гьали-гьалилерде оьзюню Москвада болувунда Дагъыстанны Башчысы Сергей Меликов РФ-ни табиат байлыкъларыны ва экология министри Александр Козлов булан ёлукъгъан. Ёлугъувну вакътисинде Дагъыстандагъы экология гьалны ёрукълашдырывгъа байлавлу болуп къалды-къулдуланы ишлетивню натижасында айлана якъны тазалыгъын къорума тюшегенине байлавлу генг кюйде гьакълашыв болгъан.
Гьакълашывланы вакътисинде Терик бойдагъы сув гьавузларында балыкъ урлукъ салагъан ерлерде тазалыкъны ва аманлыкъны болдурмакъ учун экология проектлени къуруп яшавгъа чыгъармагъа тюшегени гьакъда айрыча сёз юрюлген.
– Гертиден де, айлана якъны къалды-къулдулардан тазалавгъа байлавлу оьтгерилеген ишлер Дагъыстан учун да агьамиятлы, – деген Александр Козлов. – Гьалиге ерли Росссияны лап да къыбла боюндагъы регионунда экология талапланы гьисапгъа алып, айлана якъны тазалыгъын болдурувгъа байлавлу болуп лап да аслу саналагъан 4 къурулуш объект токъ-ташдырылгъан. Шолар гележекде харжлар булан да таъмин этилинежек. Дагъы да аянлашдырып айтгъанда, эсгерилген агьамиятлы къурулушлар учун тарыкълы харжланы 95 проценти федерал бюджетден таба къайтарыш этилинежек.
Лайыкълы пачалыкъ кёмекге оьзюню разилигин билдире туруп, ДР-ни Башчысы Сергей Меликов да къурулуш объектлени айланасында гьар тюрлю онгайлы къуллукълар болдурулагъаны гьакъда баянлыкъ берген.
– Къурулуш объектлер учун хас топуракъ пайлар гёрсетилинген ва тийишли кагъызлары гьазирленген, – деген Сергей Алимович. – Гертиден де, эсгерилген агьамиятлы экология объектлени къурулушларын толу кюйде яшавгъа чыгъарыв ломай харжлагъа харлы эди. Айтмагъа сюегеним, ишлер бу йыл башланажакъ ва 2024-нчю йылны ахырына ерли тамам болажакъ деп умут этилине.
Ишчи ёлугъувну натижасында бизин республикабызгъа тиеген дагъы да оьзге тюрлю экология масъалаланы гьакъында сёз болгъаны гьакъда айрыча эсгермеге герек. 2025-нчи йылгъа ерли Терик бойдагъы Аччыкёлде де тазалыкъны болдурувгъа байлавлу чараланы оьтгермеге гёз алгъа тутулгъан. Неге десегиз, Аграхан сув къолтукъну Аракум ва Нижне-Терский гьавузларында балыкъ байлыкъланы артдырмакъ учун сув булан толу кюйде толумлашдырывну чараларын гёрмесе, урлукъ яйыв четимлеше.
