Дагъыстанда айрыча къоллавчуланы ва къурумланы 75,8 проценти гьалиге ерли онгайлы табии газ ягъарлыкъдан пайдаланагъаны гьакъда белгили.
Озокъда, газ тартылгъан бары да муниципал къурулувларында яшайгъанлар яда буса яшавлукъ объектлер – медпунктлар, ясли-бавлар, школалар амалсыз
адамлар йимик барысыны да онгайлы ягъарлыкъдан пайдаланмагъа имканлыгъы ёкъ.
Шону гьисапгъа алып, Россияны Президенти Владимир Путинни сиптечилиги булан табии газ ягъарлыкъдан яшавлукъ гьалы осал тайпалагъа уьйлерине
яда яшавлукъ объектлеге газ тартмакъ учун пачалыкъны янындан харж булан кёмек этилине.
Шону учун пайдаландырывгъа берилген «Догазификация» деген пачалыкъ программа бизин республикабызда некъадар яшавгъа чыгъарыла?
Агьамиятлы масъалагъа байлавлу болуп бугюнлерде «Дагъыстан» деген маълумат агентлигинде ДР-ни энергетика ва тарифлени токъташдырагъан министри Ризван Муратов информацияны пачалыкъ масса къуралларыны къуллукъчуларына толу кюйде баянлыкъ берди.
Белгили болгъаны йимик, шо программада Дагъыстанны гьар тюрлю районларындагъы 305 муниципал къурулувларындан табии газ ягъарлыкъгъа харлы яшавлукъ даражасы осал тайпалар къуршалгъан. Программада ортакъчылыкъ этмеге муштарлылардан министерликге 3500 арза гелген. Шоланы 600-ю
документлери тюз къурулмагъаны саялы яда буса оьзге тюрлю себеплеге гёре гери урулгъан.
– Онгайлы ягъарлыкъдан пайдаланма муштарлыланы санаву кёп бола бара, – деди оьзюню баянында Ризван Усманович. – Айтмагъа сюегеним, Украинада болуп
турагъан артдагъы дав агьвалатлагъа гёре шонда ортакъчылыкъ этегенлеге де эсгерилген программаны оьлчевюнде харж булан кёмек этив гьисапгъа алынгъан.
Гери урулгъан арзаланы гьакъында да айрыча эсгермеге тюшедир деп ойлайман. Айтмагъа сюегеним, программаны ортакъчысы болмакъ учун оьзюне
газ тартылгъан муниципал къурулувунда гьарисини яшавлукъ уьюне ва шолай да жабарына еслик этеген документлери болмаса бажарылмай.
Къабул этилинген арзаланы есилерине тегин 100 минг манат харж берилегени гьакъда да айрыча эсгерме тюше. Программаны талаплары бу йылны ахырына
ерли тамамлангъандан сонг гележекге байлавлу болуп дагъы да болжалгъа узатылмагъа имканлы. Шону учун харжлар да федерал бюджетден гёз алгъа тутула.
