Уьчюнчю класда охуйгъан 10 йыллыкъ чагъындагъы Арапат каникулланы вакътисинде ферманы сют машининде, сонг фермада савунчу болуп ишлеген анасы Халисатгъа кёмек этип юрюй. Сонггъа таба оьзю де фермада гьар тюрлю ишлерде 50 йылгъа ювукъ ишлей. Шону 30 йылгъа ювугъун ол савунчу касбугъа багъышлагъан. Шо иш буса яманокъ тынч иш тюгюлю барыбызгъа да белгили. Ишлемеге де олай нечик де ишлемей – сав районгъа, гьатта республикагъа атын белгили этип ишлей. Оьзюне бегитилген 25 сыйырны гьарисинден райондагъылар, гьатта республикадагъы савунчулар 3–4 минг литр сют алагъанда, ол 5 минг литр сют сава. Гьеч бир йыл Арапат савгъатсыз яда башгъа тюрлю шабагьатсыз къалмай. Бир-бир йыллар буса эки де, уьч де савгъатлана. Оланы арасында акъча ва башгъа савгъатлар да бар.

1960-нчы йыллар колхозну «Гюйдюрмес» совхозгъа къошалар. 70–80-нчи йылларда «Гюйдюрмес» совхозну да, гьатта партияны Гюйдюрмес шагьар комитетини алдында ерлешген гьюрметлев такъталарындан Арапатны сураты бир йылгъа да таймагъан десем, къопдурув болмас.

Арапат шо йылланы ичинде гьеч ара бёлмей район ва юрт советлеге депутат этилинип де сайлана тургъан. Хыйлы йыллар юрт къатынланы советини председатели болуп да ишлеген. Арапатны савгъатларыны арасында социалист ярышларда уьстюнлюк къазангъан саялы да, коммунист загьматны ударнигини белгилери, медаллар ва Загьмат Къызыл Байракъ ордени де бар. Гьатта бир вакъти Арапатгъа Социалист Загьматны Игити деген гьюрметли ат бериле тура деген сююнчлю хабар савлай районну даражасында юрюле де турду. Кюйге къарагъанда, ону кандидатурасы республиканы гьакимлигини оьр канзисинден оьтмеген. Тюзю, Арапат етишген уьстюнлюк, абур-сый Мычыгъыш Республикада яшайгъан къумукълар учун о заман уллу даража эди.

Арапат тап-таза къумукъча да, мычыгъышлар да сукъланардай мычыгъышча да сёйлей эди ва сёзню яхшы англап да, сёзге гюч берип де, огъар инамлыкъ тувдуруп да бажара эди. Булай да бойлу-сойлу сюйкюмлю, Аллагь берген арив тавушу ва оьр даражадагъы пагьмусу бар Арапат этеген ва багъышлайгъан зикирни тынглавчулагъа таъсири гючлю эди. Шо да борагъан къатынланы да, савлай Борагъанны да сыйын, абурун оьр эте эди.

Борагъан къабурларда Шаба гьажини зияраты бар. Огъар юртдан, райондан, республикадан, гьатта алдынгъы СССР-ни кёп ерлеринден де адамлар геле эди. Шо зияратны ачгъычы ким-кимге де тапшурулмай. Арапатгъа буса Шаба гьажини къардашлары оьзлер тилеп ачгъычны тапшургъан эдилер.  Айтагъаным, сый-абур инсангъа бажарывлукъгъа гёре бериле.

Гьакъыллы ва англавлу адам оьзюне этеген сыйгъа уллу къаст булан жаваплы янаша. Арапат да шо зияратгъа гелген адам, юртлу болсун яда башгъа ерден гелген къонакъ болсун, ону кёп илиякълы къаршылай, тергевлю тынглап, мурадын англагъан сонг, зияратгъа элте, тийишли болагъан адатлары булан гийире, дуалары, терен ойлу сёзлери динагьлюге гючлю таъсир этмеге бажара эди. Оьзю сав чакъы Арапат шо ишни уллу иш къастлы ва гьалал юрютдю. Аврувлар, динагьлюлер огъар рази болгъандай,

 

Аллагь да огъар рази болсун!

 

 

 

Абас МАМАЕВ.