Энниден сонг гьар ватандаш Дагъыстанны ич ишлер министерлигини ёлларда аманлыкъны болдурагъан бёлюгюню сайтында ерлешдирилген маълуматгъа гёре, машинлерин эсирип гьайдайгъанланы гьакъында ватандашлар полициягъа алданокъ билдирмеге бола. Кимге, нечик билдирегенлиги де аян этилген.
Шо къайда Россияны бир-бир регионларында тезден берли юрюле. Юрюлегенден къайры, мисал учун, Янгы Уренгойда полицейскийлеге эсирген гьайдавчуну тутма кёмек этген адамны дёрт минг манат булан иштагьландыралар.
Озокъда, янгы къайданы янын тутагъанлар йимик, къаршылар да бар. Якъчылары айтагъан кюйде, машинлерин хумар кююнде гьайдайгъанланы айыбындан ёлларда лап да авур хатабалагьлар бола. Гертиден де, санавлагъа къарагъанда, бизин ёлланы аман ёллагъа гьисапламагъа тилинг айланмас. Бютюн уьлкени алгъанда, гьар гюн ёлларда орта гьисапда 44 адам оьле. Ич ишлер министерлиги билдиреген кюйде, артдагъы 10 йылны ичинде биз гьар тюрлю ёл хатабалагьларда 220 минг адамыбызны тас этгенбиз. Терен ойлашдырагъан къоркъунчлу санавлар.
Янгы къайдагъа къаршы чыгъагъанлар, шо къайда булан пайдаланып, оьзлерден ачувун алма сюегенлени «яманлап», оланы яшавунда четим-ликлер тувдурма къаражакъ деп ойлаша. Ондан къайры, адам эсирген деп янгыз медицина экспертиза токъташдырма бола.
Озокъда, къайсы якъ да инамлы далиллер гелтирмеге къаст эте. Тек бу масъалада дюньяда гьали болгъанча топлангъан сынавлагъа таянма да тюшедир. Бизде машинин эсирип гьайдагъан адамгъа 30 минг манат къоду салалар, къырыйыбыздагъы Данияда буса – 10 керен артыкъ.Россияда ичип-эсирип машининг булан оьзге адамны яшавун къыркъсанг, суд сени лап артыкъ 12 йылгъа магьрюм этмеге бола, Китайда, Индонезияда, Сингапурда оьлюм тёрелер геселер.
Балики, бизге де олардан уьлгю алма заман болгъандыр!
