Али Гьажимуратов 1936-нчы йылда тувгъан. Ол 1957-нчи йыл Яхсай орта школаны битдирген. Машинлер къыт юрюйген йылларда, исси-сувукъ деп айтмай, огъар ва ону охувчу ёлдашларына гьар гюн юртдан ари де, бери де 12 чакъырым ёл юрюмеге тюшген.
Алини охувгъа, билимлеге ес болмагъа эртеден гьаваслыгъы болгъан. Ону яшлыгъы давну алдындагъы авур, ач-сувукъ ва дав йылларына рас гелген. Ол давну йылларында тенгли ёлдашлары булан бирче авлакъларда къалгъан арпа-будай башланы, мамукъну жыймагъа ва башгъа тюрлю авлакъ ишлеге къуршалгъан.
1959-нчу йыл Али Гьажимуратов Хасавюртда З. Н. Батырмурзаевни атындагъы педучилищеге охумагъа тюше. Ону битдирген сонг 1962-1963-нчю йылларда юртунда башлапгъы класланы муаллими болуп ишлей. 1969-нчу йыл буса ол заочно Буйнакск шагьарда юрт хозяйство техникумну битдире ва «техник-механик» касбугъа ес бола. 1982-нчи йылда Магьачкъалада Дагъыстан педагогика институтну физика- математика факультетинде охуй.
1972-нчи йылдан тутуп, бугюнге ерли ол физикадан, математикадан, черчениеден, суратдан ва технологиялардан дарслар берип ишлеген ва ишлей.
Гьажимажагьатюрт школада ишлейген вакътисинде ол оьзюн билимли, касбусуна толу кюйде берилген, англавлу, бажарывлу, абурлу адам ва педагог гьисапда танытгъан. Муаллим касбусундан къайры да, ол пагьмулу суратчы да дюр.
Къумукъланы алим болмакъдан эсе, адам болмакъ къыйын деген айтыву бар. Али Алимсолтанович Гьажимуратов буса – шо эки де сыйлы атны еси.
Ону къошум уьйретивлер береген кабинети сав школада уьлгюлю онгарылгъан. Математикадан, физикадан, технология предметлерден кёбюсю гёрсетив таблицалар, стендлер, алатлар, къураллар ону оьзюню уста къоллары булан этилген. Али Алимсолтанович аслу дарслардан къайры да, физикадан, технологиядан факультатив кружоклар да юрюте.
Ол охутгъан яшланы кёплери, орта ва оьр хас охув ожакъланы битдирип, жамият яшавунда, иш уьстюнде лайыкълы ерлер тутгъан ва оьз яшавларын онгаргъан.
Али Гьажимуратов – уьлгюлю уьягьлю де къургъан. Бираз алларда ону агьлюсю гечинди, тек, шо авур тас этивге де къарамайлы, ол ругьдан тюшмеди. Яшларындан ва яшларыны яшларындан сююнюп-къуванып яшай ва ишлей.
Ат туягъын тай басар дегенлейин, ону авлетлери де муаллим касбуну танглагъанлар. Къызы Бийке Грозныйдеги университетни физика-математика факультетин битдирген. Буссагьатгъы вакътиде атасыны яннавурунда школаны директоруну орунбасары болуп ишлей. Уланы Тулпар да шо университетни радио-физика факультетин битдирген.
Али Гьажимуратов 1983–1995-нчи йылларда, школаны профсоюз къурумуна ёлбашчылыкъ этип, намуслу ва бажарывлу иш кютдю. 1995-нчи йыл юрт советни депутаты болуп сайлангъан ва гьаракатчы иш гёрсетген. Ол бир нече пачалыкъ савгъатланы да къазангъан.
Гьайран тизив, асил адамны ва сынавлу муаллим Али Алимсолтановични оьтген касбу байрамы булан къутлай туруп, мен огъар яхшы савлукъ, ожагъына берекет, ювукъ дос-къардашына кёп яхшылыкълар, ишинде де янгы охув йылда гьакъыллы, бажарывлу, пагьмулу ва тынглавлу охувчулары болмакъны ёрайман!
Нажабат ЮНУСОВА.
Гьажимажагьатюрт.
СУРАТДА: Али Гьажимуратов.
