Мен оьзюмню макъаламда язмагъа сюеген бабаюртлу Юсуп Юсупов да шолайланы бириси. Ол оьзюню савлай яшавун сув булан байлагъан.
«Къую къурумай туруп, сувну хадирин билме къыйын», – деген Бенджамин Франклин. Амма Юсуп Юсуповну яшавуна гёз къаратса, ол яшдан тутуп шо къуюну хадирин билип, ону къурума къоймай сакълагъаны гьис этиле. Неге тюгюл де, юрт школаны, сонгунда Новочеркасск шагьардагъы сувчуланы гьазирлейген институтну битдирген Ю.Юсупов гетген асруну 59-нчу йылындан башлап Бабаюрт райондагъы Дзержинскийни атындагъы сугъарыв системада ишлемеге башлай. Оьзюню загьмат ёлун сугъарыв системада участковый гьисапда башлагъан Ю.Юсупов эсгерилген идарада ремонт-къурулуш бёлюкню ёлбашчысы, инженер, участканы ёлбашчысы болгъан, баш инженерге ерли гётерилген. Сонгунда ол сугъарыв системаны ёлбашчысыны орунбасары болуп да белгилене. Амма ол къайсы бёлюкде ишлесе де, не къуллукъну кютсе де, иш ёлдашларыны арасында бажарывлу ёлбашчы, пагьмулу къуллукъчу ва инамлы къурдаш гьисапда таныла.
Ону оьз ишине берилгенлиги, коллектив булан ишлеп болагъанлыгъы ва терен билими огъар район учун, сабанчылар учун пайдалы болуп ишлемеге кёмек эте. Неге тюгюл де, республиканы уллу юрт хозяйство району саналагъан Бабаюрт районда сугъарыв сувну заманында къоллавчулагъа етишдиривден савлай районну экономикасыны алгъа барыву гьасил болагъанны ол яхшы англай ва ишинде хатасыз ишлемеге гьаракат эте. Огъар шо намуслу борчну кютмек учун гюн де, гече де авлакъ-авлакъларда, татавул-татавулларда юрюмеге аз тюшмеген.
Иш адамны тюгюл, ишни адам безейгени герти экен. Айрокъда шо Ю.Юсуповгъа бек къыйыша. Бугюн сувчуланы ишине къол силлейгенлер ёлугъа буса да, оланы иши нечик къыйын экенни ва олар оьзлени бойнуна тюшген авур юкге де къарамай, ишини ахырына чыгъагъаны тамаша тие.
Юсуп Юсуповну ишине берилгенлигин, ону билимини теренлигин ва бажарывлугъун Ватаны да тергевсюз къоймай. Советлер Союзу къурулгъанлы 60 йыл битегенликге байлавлу болуп 1983-нчю йылда юрт хозяйство тармакъны оьсювюне этген къошуму саялы, Дагъыстан АССР-ни Оьр Советини Президиумуну къарары булан Ю.Юсуповгъа «ДАССР-ни ат къазангъан сувчусу» деген ат бериле.
Амма ол янгыз оьр атгъа ес болмакъ учун тюгюл, халкъына пайдалы болмакъ учун ишлей. Къайсы участкада ишлесе де, оьзюн яхшы къурумчу ва билимли касбучу гьисапда таныта. Топуракъланы сугъарывда ону билими ва сынаву аз тарыкъ болмай. Салынгъан масъалаланы тюз ва заманында чечип болагъанлыкъдан районда баш тюшюмлер болдурувну масъалаларын да чечмеге имканлыкълар тува. Шону учун огъар республиканы Сугъарыв ва сув хозяйство министерлигини гьюрметлев грамоталары да бир нече керенлер берилген.
– Ю.Юсупов оьзюню жаваплыгъы ва тергевлюгю булан таныла, – дей ону иш ёлдашы, Дзержинскийни атындагъы сугъарыв системаны бёлюгюню инженери И.Апаева. – Иш ёлдашларыны арасында ону абуру аслам. Ону яшав сынаву ва ишин билегенлиги оьсюп гелеген яш наслугъа гьаман да уьлгю болажакъгъа шеклик ёкъ.
Ю.Юсупов уьлгюлю ата да дюр. Яшавну тайгъакъ сокъмакъларына, къыйынлыкъларына ва авурлукъларына къарамай, ол оьзюню кёп сюеген агьлюсю Нурсият булан татывлу агьлюде дёрт авлетни – уьч къызны ва уланны оьсдюрген ва тарбиялагъан. Олар авлетлерине тюз тарбия ва билим бермеге де болгъанлар.
Пенсия чагъына етишгенге де къарамай, оьзю кёп сююп танглагъан касбусун 54 йылны боюнда юрютген Ю.Юсупов бугюн уьюнде, авлетлерини авлетлеринден къуванып, гьар гюнюнден сююнюп яшай. Биз де огъар яхшы савлукъ, узакъ оьмюр ва бары да яхшылыкъланы ёрамагъа сюебиз.
Г.ГЬАЖИЕВ.
Бабаюрт.
СУРАТДА: Ю.Юсупов.
