Гьасанхан 1987-нчи йылда Магьачкъаланы Киров район бёлюгюнде оперативный къуллукъчу болуп ишлеме башлай. Ишине жаваплы янашагъан яш офицер йылдан-йылгъа иш канзилерде оьрлене. Эки йылдан ол ич ишлени старший оперативный къуллукъчусу, 4 йылдан буса Киров район бёлюкню начальнигини орунбасары бола. 1996-нчы йыл огъар майор, 4 йылдан сонг подполковник чин бериле.
2003-нчю йылда Дагъыстанны ич ишлер министерлигини янында янгы оператив бёлюк ачыла, Гьасанханны шонда начальник этип чыгъара. Арадан 3 йыл гетип, ону Магьачкъаланы Киров РОВД-сини криминал бёлюгюню начальниги эте, арадан 1 йыл оьтюп, Советский РОВД-ге шолай бёлюкню ишине ёлбашчы этип чыгъара. Къайда ва не ерде ишлесе де, Гьасанхан ишине намуслу ва жаваплы янашгъан.
Криминал бёлюк ич ишлерде инг де къыйын ва жаваплы бёлюк деп гьисаплана. Гьасанхан бир заманда да ёлдашларыны артына гирип яшынмагъан, даим де алда тургъан, нечесе керен жинаятчыланы тутувда къоччакълыкъ гёрсетген.
Ол артдагъы йыл Магьачкъаланы Киров районуну РОВД-сини начальнигини ишлерин кютюп ишлеген. Ол оьзюне таби къуллукъчуланы даим гьайын этип тургъан, бир де оьзюн олардан оьрге салмагъан. Шону учун болма да ярай, ич ишлени къуллукъчулары ону кёп сюйген. Иш ёлдашлары айтагъан кюйде, къыркъ йыллар болагъан подполковник чиндеги Гьасанхан оьзю бек простой адам болгъан. Огъар дагъы да оьр къуллукълагъа оьрленме имканлыкълар да болмай къалмас эди.
2008-нчи йыл 25-нчи октябрде ахшам уьюне къайтып гелеген ёлда ону жинаятчылар къаравуллап тургъан ва гюллеге тутгъан. Алынгъан яралардан Гьасанхан гечинген. Террорчулукъ этегенлер оьзлеге къаршылыкъ билдирегенлени ал сыдраларындагъы къоччакъ уланны оьлтюргенбиз деп узакъ сююнмеген. Арадан бир ай да оьтгенче, оьзлер де оьлтюрюлген.
Жинаятчылар булан къаршы ябушгъаны ва оьзюню ишин намуслу кютгени ва къоччакълыкъ гёрсетгени учун Россияны Президентини къарары булан Гьасанхан Аскерханович Керимов 2009-нчу йылда «Къоччакълыкъ» деген орден (оьлгенден сонг) савгъатлагъан.
Гьасанхан 1984-нчю йыл Саламат булан уьйленген, олар 1 къызны ва 2 уланны тарбиялагъан. Уллу къызы охуп битип, МВД-ни больницасында врач болуп ишлей, уланы Артур ДГУ-ну юридический факультетин бите тура, гиччи уланы Жамал школада охуй.
25-нчи октябрде Гьасанхан Керимов гечингенли 5 йыл бите. Къабур тёбе басылгъан, яралы юреклер къатывсырагъан. Озокъда, агьлюге ата етишмей, тек яшлары атасы халкъны аманлыгъын сакълай туруп жанын бергенге бек оьктемлер.
Огъар багъышланып бир нече шиърулар да язылгъан. Сизин тергевюгюзге, Гьасанхан гечинип, уьч-дёрт ай болагъанда язылгъан Разия Алиеваны шиърусун беребиз.
Оьмюрюбюз гетип бара яшавда
Бары халкъгъа насип яшав алгъышлап.
Иш уьстюнде оьлтюрюлген жан берип
Мен язаман Гьасанхангъа багъышлап.
Къысгъа оьмюр Яратгъаным язгъандыр,
Бир амал ёкъ Тенгир этген кююне.
Чарс басгъандай эсде ёкъда дюньяны,
Аччы хабар етип гелди уьюне.
…Уьч ай битди, гёзьяшлары анангны
Чубурушуп, гёзню нюрю битгени.
Бир гечеден ап-акъ болду чачлары
Аврув тапгъан сен дюньядан гетгенли.
Къатынынг да гёзьяш тёге эсгерип,
Яшларынгны гёнгюн алмагъа къарай.
Атынг айтса, гете бирден сесгенип,
Сагъа олар женнетни тёрюн ёрай.
Нече де чалт гюнлер гетди билинмей,
Ойлашабыз, тюнегюнмю. бугюнмю?
Бары халкъгъа этген сыйынг, абурунг
О дюньяда уллу савгъан тюгюлмю?
Сабурлукъну Аллагь берсин ананга,
Оьмюр бою дагъы хатар гёрмесдей.
Ятгъан еринг йымышакъ болсун санынга,
Яратгъаным сагъа азап бермесдей.
Гебек КЪОНАКЪБИЕВ,
оьз мухбирибиз.
СУРАТДА: Гь. Керимов.
