Савлукъ гьакъда сёз чыкъса, даим акъ халатлы докторланы эсге алабыз. Гьалиги заманда врачлар булан иши-аварасы болмагъан бирев де ёкъдур деп эсибизге геле.

Савлукъ гьар кесге берилген табии байлыкъ болгъандан къайры, савлай жамиятны байлыгъы болуп да арагъа чыгъа. Биз бирев-биревге ёлукъгъанда, бирев-биревден айырылывда, шатлы гюнлерибизде даим савлукъ ёрайбыз. Бизин биринчи сёзюбюз-соравубуз савлукъ нечикдирден баш алмаймы дагъы? Савлугъу ёкъ адамгъа «алтын уьй де аявсуз» деп бизин уллулар негьакъ айтмагъандыр чы.

Насипли, талайлы яшавну оьзекбашы – савлукъ болуп токътагъаны барыбызгъа да эжелден белгили. Бизин савлугъубузну бузулма-тозулма ёл къоймай, сакълавчуларыбыз–докторлар – аврувлар учун лап да ювукъ, лап да багьалы адамлар. Муна шо бизин савлугъубузну сакълайгъан-къоруйгъан Р. П. Аскерхановну атындагъы Хасавюрт шагьар больницаны 2 номерли неврология бёлюгюне мунда ятагъанланы тилевюне гёре сапаргъа чыкъма токъташдыкъ.
Башлап бизин къаршылагъан медсестра Разия Бад­рутдиновна Байтемирова бёлюкню заведующийи Залина Гереевна Гереева булан таныш этди. Бёлюкдеги тазалыкъ булан шыплыкъ шоссагьат мундагъы иш низамны асувлу кюйде салынгъанына шагьатлыкъ эте.

Залина Гереева, бизин насибибизге, гелгенлер булан ачыкъдан лакъыр этме сюеген адам болуп чыкъды. Ол эсгерген кюйде, мединститутну битдирген сонг Тула шагьарда медсанчастда 6 йыл ишлеген. 2017-нчи йылда бу больницада неврология бёлюк ачылып, загьмат ёлун давам этегени беш йыл бите.
– Бизин бёлюкде бир вакътини ичинде 50 адам ятма бола,–деп сёзюн башлады Залина Гереева. –Врачларыбыз да – ишин сюеген ва билеген касбучулар. Патимат Гьажиевна Иманалиева – оьр категориялы врач, Мадина Османовна Жантемирова ишине берилген врач деп ташдырып айтма боламан. Старшая медсестра Элмира Бамматовна Дагьирова, медсестра Разия Бадрутдиновна Байтемирова оьз ишинде хыйлы сынав топлагъанлар.
Магъа бу бёлюкде нер­валарын «йымышатмакъ» учун ятгъанлар булан ла­къыр этме тюшдю.

Жамиля Садисова (Хасавюрт), Наталья Шевченко (Хасавюрт), Арслан Ибрагьимов (Темиравул), Патимат Агьматова (Ленингент). Булар докторланы янындан оьзлеге болагъан бары да зат этилегенни уллу ругьланыв булан айтып тербей туруп, врачы Мадина Османовнагъа ва бары да медсестралагъа газетден таба оьз­лени савболун-баракалласын берме сюегенни айтдылар.

– Мунда, – деди Наталья­ Ивановна, – бизин янгыз­таблеткалар, уколлар, капельницалар булан къолай этмей, гёнгюбюз ачылардай илиякълы сёзю булан да, гьайлы янашыву булан да аякъгъа тургъузма, къолай этме къасткъылалар.

Савболлашывну вакътисинде Залина Гереевнаны китап тахчасындагъы накъышлы рамкалар гёзюме илинди.

«Чистое сердце» деген сахават фондну ишине аслам къошуму учун Дагъыстан Рес­публиканы алдынгъы Башчысы Владимир Васильевни ва ишине гьакъ герти берилгени, халкъгъа уллу сюювю, ишдеги уьстюнлюклери учун Пачалыкъ Думаны депутаты А. В. Магарамовну къолу салынгъан Баракалла кагъызлар, гертилей де, Хасавюрт больницаны 2 номерли неврология бёлюгю къурч загьматы булан халкъны сюювюн-абурун да, пачалыкъ чалышывчуланы гьайлы янашывуна лайыкълы болгъанын да исбатлай. Къой, даим шолай болсун!