Олимпиадада республиканы лап да яхшы агрономлары, шо санавда Бабаюрт райондан Мужукъайдагъы «Ислам» деген сабанчы-фермер хозяйствону башы Р. Гьажиимавов, Люксембургдагъы «Гьажимурат» деген сабанчы-фермер хозяйствону начальниги А. Алибеков ортакъчыкъ этдилер. Ери гелгенде, агрономланы олимпиадасында ортакъчылыкъ этгенлени кёбюсю Дагъыстан аграр университетни тамамлагъан эдилер, бирлери буса бир вакътиде янаша олтуруп, бирче де охугъан эдилер. Олар бир-бирин исси къаршылай, оьзлени охутгъан алимлер, муаллимлер булан лакъыр этелер, оьтген заманланы эсге алалар. Бу къаравулланмагъан ёлугъув кёп затны оланы эсине салды. Охугъан студент йыллары гьакъда да кёп хабарлар юрюлдю.
Олимпиаданы оьтгермек учун къурулгъан къурум комитетге АПК-ны инг бажарывлу касбучулары, оьр охув ожакъланы оьр даражалы дарс беривчюлери, илму-ахтарыв идараланы алимлери къуршалып, агрономланы яратывчулукъ якъдан бажарывлугъун ачыкъ этмек ва гьазирлик даражасын къыйматламакъ муратда охувгъа ва сынавгъа байлавлу соравлар булан билетлер гьазирлеген эдилер. Шо билетлер олимпиадада ортакъчылыкъ этеген агрономлагъа пайланып берилди. Олар гьар соравну уьстюнде къаныгъывлу кюйде ишлейгенин олагъа къарагъанлар ачыкъ кюйде гьис этме бола эди.
Охув-билим якъдан юрюлген чарагъа гёре олимпиаданы ортакъчылары оьзлени алдына салынгъан соравлагъа жаваплар берген сонг, олар университетни уьйренив хозяйствосуна бардылар. Мунда агрономлар, тюрк специалистлени ортакъчылыгъы булан 6 гектар ерге интенсив къайдада емиш бав салывда биринчи терекни орнатывда ортакъчылыкъ этдилер. Шо иш байрамда йимик юрюлдю. Бу байрамны ачывда къызыл лентаны Дагъыстанны Гьукуматыны вице-премьери Ш. Шарипов, аграр университетни ректору З. Жанболатов ва «Бидамли» деген тюрк компанияны директору А. Арифоглу гесип, терек орнатывгъа ёл ачдылар.
Шондан сонг университетни актовый залында олимпиаданы гьасиллери чыгъарылды. Мунда вице-премьер Ш. Шарипов чыгъып сёйлеп, артдагъы вакътилерде юрт хозяйствону ва ону булан байлангъан загьматчыланы абурун гётермек учун хыйлы ишлер этилип турагъанны гьакъында айтды.
Дагъыстанда биринчилей сабанчыланы форуму, жынслы къойланы выставкасы, бугюн буса агрономланы олимпиадасы оьтгериле. Шо мердеш гележекде де давам этилежек. Юрт хозяйствону оьсдюрювде оьр усталыгъы булангъы агрономлар тарыкъ болажакъ, шо касбуну абуру йыл сайын артажакъ. Сабанчыланы форумунда «Ана топуракъ чакъыра» деген къарар къабул этилген эди. О топуракъ булан ишлейгенлер учун чакъырыв да болду. Биз шо чакъырывдан баш алма, топуракъланы гелимлигин артдырма ва юрт хозяйство продукталардан мол тюшюмлер алывгъа етишмекни гьайын этме герекбиз. Шо ишге маълумат къуралларын да актив кюйде къуршама герек болажакъ. Республика ва район оьлчевде оьтгерилеген чаралар, маълумат къураллардан таба берилме ва юртланы загьматчыларына етишдирилме, даим юрт хозяйство булан байлавлу темалагъа гёре материаллар печат этилме тарыкъ, – деди Ш.Шарипов.
Аграр университетни ректору Зайдин Жанболатов оьзюню сёйлевюнде, нечакъы къыйын буса да, охув ожакъланы охув-производство базасын сакълама болгъаны гьакъда айтды.
Лап да ахырда олимпиаданы бары да ортакъчыларына дипломлар тапшурулду. Олимпиадада биринчи ерлени алгъанлагъа грамоталар, дипломлар ва акъча савгъатлар берилди.
Охув якъдан юрюлеген чараланы вакътисинде мунда ортакъчылыкъ этгенлени чагъына гёре берилген соравлагъа алынгъан жаваплардан белгили болгъан кюйде, янгыз бир агрономгъа 30 йылдан тёбен бола. Къалгъанлары 40 йылдан 70 йылгъа етише. Шо буса юрт хозяйство касбучулар эсли болгъанны, шо тармакъгъа яш адамланы болгъан чакъы къуршама герекни ачыкъ этип гёрсетди.
– Олимпиадада алдынлы ерни алмакъ тюгюл, ортакъчылыкъ этмек де бизин учун бек пайдалы болду, – деди мужукъайлы агроном Руслан Гьажиимавов. – Биз мунда оьзюбюзню билимибизни камиллешдирмеге болдукъ, сынав топладыкъ. Гележекде шо сынавну иш булан да яшавгъа чыгъармагъа къаст этежекбиз.
Оьтгерилген бу олимпиада республикада юрт хозяйство производство лап да аслу тармакъ экенин ва гележекде ону оьсдюрювге генг ёл ачажагъын исбатлады.
А.Хамаматов.
СУРАТДА: алдынлы ерлени алгъанлар савгъатлана.
