ДР-ни юрт хозяйство ва ашамлыкъ министри Б.Батталов:

– Гьар къайсы предприятиеге йимик, эсгерилген заводгъа да гьар заман да иш еринде табылагъан ёлбашчы тарыкъ. Бизге заводну акционер жамиятгъа айландырывгъа байлавлу къастны чалтлашдырмагъа тюше. Неге тюгюл предприятиеде тувулунгъан четим гьал ону толу ва тийишли кюйде ишлевюне пуршавлукълар ярата. Бугюнлерде тувулунгъан четим шартларда буса этилмеге тарыкъ ишлер айрыча кёп. Шо саялы да топлангъан масъалаланы чечив булан толу кюйде машгъул болажакъ, асувлу иш юрютюп бажарагъан ёлбашчы тарыкъ, – деди министр.

Баттал Батталов жы­йылгъанлагъа англатгъан да йимик, Къызлардагъы коньяк чыгъарагъан заводну тозулмагъа къоймайлы, олай да мунда чы­гъарылагъан малланы сан янын ва шоланы  сатывну къадарын кемитмейли сакъламакъ республиканы ёлбашчыларыны аслу мурады болуп токътай.

–  Къызлардагъы коньяк чыгъарагъан завод йимик уллу предприятиени акционер жамиятгъа айландырывгъа байлавлу масъалаланы бизин республиканы Башчысы Рамазан Абдулатипов оьзюню тергевюню тюбюнде сакълай. Ол заводну акционер жамиятына айландырывну пачалыкъны пайдасын гьисапгъа алып, закондан тайышмайгъан кюйде оьтгермеге тийишли ведомстволагъа тапшурув берген, – деп узатды министр оьзюню сёйлевюн.  

Оьз гезигинде заводну ишчилери генеральный директорну къуллу­гъун гийирип, предприятиени уставына этилеген алышынывлар булан рази къалагъаны гьакъда айтды. ДР-ни юрт хозяйство ва ашамлыкъ министри оьзюню сёйлевюнде заводну къуллукъчуларыны  пикрусун якълайгъанын билдирди. Эсгерилген предприятиени ёлбашчылыгъында, олай да заводну ишине байлавлу оьзге алмашынывлар коллектив булан гьаллашгъан сонг этилежегине жыйылгъанланы инандырды.

Оьтгерилген жыйынны барышында заводну малларын сатывгъа чыгъарывну, олай да предприятиени алдында токътагъан артгъа салынмайлы чечилмеге тюшеген масъалалар да арагъа салынып ойлашылды. Оьзлени къайтарагъан болжаллары оздурулуп турагъан кредитлени тёлеп, заводну  банкланы алдындагъы борчларын тайдырывгъа айрыча тергев берилди. 

Эсигизге салабыз, Халкъ Жы­йыныны сессиясында къабул этилген законгъа гёре бу йыл тамамлангъанчагъа бизин республикада иш гёреген 20 пачалыкъ унитар предприятие ачыкъ акционер жамиятына айландырылмагъа тарыкъ. Шоланы арасында Къызлардагъы коньяк чыгъарагъан завод да бар. Шолай алмашынывлар шо предприятиелени гележеги гьисапгъа алынып оьтгериле. Предприятиелени ачыкъ акционер жамиятларына айландырылгъан сонг  олагъа финанс гьалын яхшылашдырмагъа, инг алда инвестициялар гьисапда кёп къадарда акъча маяланы къуршамагъа къошум имканлыкълар яратыла.

Шондан къайры да, эсгерилген завод, пачалыкъ унитар предприятие гьисапда юзюм борла орнатмакъ учун субсидия гьисапда гёрсетилеген харжланы алмагъа болмай эди. Касбучулар токъташдырагъангъа гёре, завод ачыкъ акционер жамиятына айланса, юзюмлюклер орнатып, шолардан къайтарылгъан тюшюмню оьзлени пайдасына къолламагъа болажакъ.

Буссагьатгъы вакътиде эсгерилген завод гьар йыл бизин республикада ва ондан тышда да иш гёреген оьзге юрт хозяйство предприятиелерден 50 минг тондан да артыкъ юзюм сатып ала. Эгер де завод юзюм борланы оьзю оьсдюрсе, тизив хаммалны къолламагъа, олай да чыгъарылагъан малны сан янын яхшылашдырмагъа, инг аслусу, предприятиени оьсювюн болдурмагъа имканлыкълар артажакъ. Къызлардагъы коньяк чыгъарагъан завод бугюнлеге ерли савлай уьлкеде ачыкъ акционер жамиятына айланмагъан оьзюню даражасындагъы биргине-бир предприятие экенин айрыча эсгермеге тюше. 

 

Н. Байболатов.