Бугюнлерде Магьачкъалада М-С. Гусаевни атындагъы республика газет-журнал комплексинде ДР-ни далапчылыкъны оьсдюрюв ва инвестиция агентлигини бёлюгюню баш касбучусу Шапи Мугьитдинов регионну журналистлерине далапчыланы ишлери ва оланы алдында токътагъан борчлары гьакъында оьз пикруларын малим этди.

 

– Бизин республикабызда уллу производство предприятиелер кёп тюгюл, – деди ол оьзюню баянында. Шону учун увакъ ва орта далапчылыкъ  булан машгъул болмагъа муштарлы тайпалар бизин къурумну янындан пачалыкъ оьлчевюнде этилеген кёмекден магьрюм къалмасын учун чаралар гёрюле. Натижада, далапчыланы янындан этилинеген къуллукълардан ва чыгъарагъан малларындан ич ва тышдагъы къоллавчулагъа пайдаланмагъа ёллар ачыла. Иран ва оьзге тюрлю арап пачалыкълар, Азербайжан, Узбекистан, Китай булангъы сатыв-алыв байлавлукълар беклеше. Тышгъа сатывгъа дюгю, къой эт, емиш сувлар, гьюрбеч ва оьзге тюрлю ашамлыкъ малланы йиберив баргъан сайын къолайлаша.  Шо гьаракат гележекде де бошамай давам этилежегине шеклик этмеге тюшмей.

Борчларына бажарывлу кюйде янашагъан далапчы тайпалар пачалыкъ кёмекни башгъа-башгъа имканлыкъларындан пайдаланмагъа бола. Шолайлыкъда, олагъа лизингге техника къуралланы, машинлени беривню натижасында производствосун генглешдирмеге ва янгы ишчи ерлер ачмагъа ­онгайлыкълар арта. Шо да 1 мингге ювукъ ишчи ерлени ачмагъа кёмек этген. Производствону генглешдиривню натижасында ишчи ерлени ачылывуна гёре налогланы тёлевде натижалар да бир къадар къолайлашагъаны ачыкъ болуп гёрюне.

Аз-кёп оьлчевде буса да, далапчыланы талапларын гьисапгъа алып, банклар ва шолай да башгъа-башгъа фондлар, мадарлы тайпалар, къурумлар  кёмекге къол ялгъайгъаны да увакъ ва орта бизнесни оьсювюне къошум эте.

 

Къ. КЪАЗАКЪМУРЗАЕВ.