Шолайлыкъда, эсгерилген уьлкелерден Россиягъа гелеген промышленный ва сурсат маллар бир йыл болжалгъа токътатыла. Тышдан гелеген сурсат малланы токътатыв бизин ашамлыкъ маллар сатылагъан базарларыбызны ишине, къоллавчуланы талапларына нечик таъсир этежек деген сорав тувулуна.
Шо гьакъда тёбенде ДР-ни юрт хозяйство ва сурсат министри Баттал Батталов «Ёлдашны» охувчуларына тёбенде шулай баянлыкъ бере.
– Башында Американы Бирлешген Штатлары да булан Евросоюз ва оьзге пачалыкълар белгили себеплеге гёре Россияны экономика къысасгъа салмагъа къаст эте. Демек, тюбек—топ атмайлы, бизин тас этивлеге тарытмагъа белсене. Шолайлыкъда, оьзге малланы йимик, Россиягъа тышдан гелеген сурсат малланы да къыт этмеге сюелер.
Шо масъалагъа байлавлу болуп бугюнлерде ДР-ни юрт хозяйство ва сурсат министерлигинде сурсат аманлыгъыны гьакъында агропромышленный тармакъда чалышагъан белгили касбучулар, алимлер булан бирлешген уллу жыйын оьтгерилди. Шонда эркин кюйде юрюлген гьакълашывну натижасында жыйынны бары да ортакъчылары бир пикругъа гелдик. Шулай шартларда тышдан гелеген сурсат маллар токътатылагъан заманда юрт хозяйство продукция оьсдюрюв булан машгъул болагъан дагъыстанлы сабанчылагъа ва юрт хозяйство предприятиелеге, гьаракатын артдырып, базарланы бошалагъан ерлерин толтурма имканлыкъ тувулуна.
Шо саялы да аявлу заманны тарыкъсыз ойлагъа бойсынып къолдан чыгъармайлы, эсин тас этмейли, юрт хозяйство тармакъда чалышагъанлагъа уьлкебизни ва республикабызны башчыларыны янындан да къаст этмеге таклиф этиле. Дагъыстанны юрт хозяйство продукция оьсдюрюв булан машгъул болагъан предприятиелерине ва сабанчыларына, россиялы къоллавчулагъа оланы талапларын гьисапгъа алып, юзюмчюлюк, бавчулукъ, овощчулукъ,гьайванчылыкъ, къушчулукъ, чалтик оьсдюрюв, балыкъчылыкъ ва башгъа тармакъларда болдурулагъан гьар тюрлю продукциясын таклиф этмеге имканлыкълар арта.
Неге тюгюл, Дагъыстанда кёп къадарда емиш, юзюм, овощлар болдурула. Мисал учун айтгъанда, ерли талаплар учун 600 минг тон авлакъ ниъматланы оьсдюрмеге герек буса, гьакъыкъатда бизин республикабызда 1 миллион тондан да кёп тюшюм къайтарыла. Шо буса Россияны ичинде лап да гёрмекли натижа ва биринчи ердебиз деп де айтмагъа ярай.
Бугюн де Дагъыстан Къызлар, Хасавюрт, Кикуни, Кегер, Гергебил, Тагьиргент консерва заводланы Избербашдагъы «Дагагрохолдинг», Магьачкъаладагъы «Денеб», Буйнакскидеги «Дружба», Ботлихдеги «Нагорный Дагестан» деген ва оьзге тюрлю акционер жамиятланы, юрт хозяйство предприятиелени, сабанчыланы продукциясын россиялы къоллавчуланы алдына сатывгъа чыгъарма гьазир.
Шону учун Дагъыстанны юрт хозяйство ва сурсат министерлигини янында юрт хозяйство продукцияны къабул этип сакълавгъа салыв ва сатывгъа чыгъарыв булан машгъул болагъан хас центр къурулгъаны гьакъда да айрыча эсгермеге сюемен.
Яшырылгъан затынг зайыпланар, берген малынг къайтып гелир деген айтывгъа арт бермеге герекмей. О саялы да биз бугюнлерде ачыкъ кёкню тюбюнде оьсдюрюлген авлакъ ниъматлар булан дазуланмайлы, гележекде Дагъыстанда теплицаларда 8 минг тондан кем болмайгъан къадарда овощ продукция оьсдюрмеге умут этебиз. 2013–2015-нчи йыллагъа ерли хас республика программа къурулгъаны гьакъда да айрыча эсгермеге герекдир деп ойлайман.
Баянымны ахырында, алгъа салынгъан жаваплы ва сыйлы борчланы гьисапгъа алып, гележек учун оьтген жыйында биз тийишли къарарны да къабул этегеник негьакъ болмас деп айтмагъа сюемен.
К. КАРАЕВ.
