Бизин къумукъ адабиятгъа мекенли къошум этип гелеген шаирлени къайсы да яшлагъа багъышлап, олай да гиччипавланы тилинде шиъру асарлар яратгъан. Бу йыл май айны 9-нда оьзю тувгъанлы 90 йыл тамамланагъан Эндрей юртда тувуп оьсген белгили журналист ва шаир Бийсолтан Гьажимуратов оланы бириси гьисаплана.

Ол хыйлы йылланы боюнда бизин «Ёлдаш» газетни редакциясында чалышып тургъан, чеберликни чет сокъмагъына тюшюп, къумукъ халкъгъа къуллукъ этген. Гьар тюрлю йылларда ону «Акъташ», «Тюрленив», «Субай», «Сабур къыз», «Асгер яш», «Суратчы къыш» деген ва оьзге китаплары басмадан чыгъып, охувчулагъа етишген. Оьзю тувгъанлы 90 йыл битегенликни гёз алгъа тутуп, гьали де ону бир нече шиърусун сизин тергевюзге бермекни тийишли гёрдюк.

Бийсолтан ГЬАЖИМУРАТОВ

Оьрдек балалар

Оьрюшге чыкъгъан
Оьрдек балалар,
Оьзенден таба
Оьтюп баралар.

Юзелер олар
Тюшюп агъымгъа.
Ошайлар сари
Минчакъ тагъымгъа.

Анасы алда
Низамны тута,
Гьарсыз балалар
Ону унута.

Бири-биринден
Сюе оьтмеге,
Барагъан ерге
Башлап етмеге.

Бала юреклер
Болса да гиччи,
Сабурсузлукъгъа
Толгъан чы ичи.

Сакинатны сораву

Сакинат согъан арчый,
Саркъып агъа гёзьяшы.
Гёзю ачытгъан сайын,
Ойлардан тола башы.

Согъанны аччысын ол
Зулмучугъа ёрагъан,
Ахырда атасына
Барып булай сорагъан:

– Атам, шу согъанланы
Фашистлер оьсдюреми?
– Оьсдюрмей. Эсде ёкъдан
Шолай сорав береми?

– Дагъы неге согъанлар
Адамланы йылата?
Атасы англап, ону
Башын сыйпап йыбата.

Гиччи уста

Чапгъы алып къолуна,
Чора ишге гирише.
Чабылгъан такъталары,
Четим тюшюп, эрише.

Чалт-чалт тюзлеп, олагъа
Чора тюзлеп мых къагъа.
Чёкюч къолуна тийип,
Гёзлеринден яш агъа.

Шо иш гьали, гертиден,
Талчыкъдыра атасын.
Атасы гелип артда,
Тюзлей ону хатасын.

Уя къура къушлагъа,
Къыйыны гетмей зая.
Гиччи устагъа къарап,
Анасы да иржая.