1 кило бал жыймакъ учун бир агьлюдеги жибинлеге 144 минг 840 чакъырым мезгил гечмеге, 8 миллион чечекни «оьпмеге» герек. Оьзюню бал «хуцирисин» балгьамлы азыкъдан толтурмакъ учун жибин 100-ден де артыкъ чечекге къона, шоланы демли сувун соруп ала.
Жибинлер бир-бири булан къатнап, генгешип де бажара. Аслу гьалда тюрлю тербенишлер, бийив нишанлар этип.
Дюньяда Антарктидадан оьзге къалгъан ерлерде балжибин яшавлукъ эте. Олар чечеклени жутлашдыра, къонмаса, емишлер булан гьар тюрлю урлукълар амалгъа гелмей. Шоллукъда, ерде моллукъну, азыкъны артдыра.
Къырда оьзлер этген уяларда болагъан бал уьйдеги уялардагъы балдан эсе гючлю де, таза да бола дейлер. Алдын, гертиден де, балжибинлер бийик тереклени къувушларында оьзлеге сыйынмагъа уялар эте болгъан. Гьалиги йимик уялар этилегени 200 йыл бола. Демек, шондан жибинчилик юрт хозяйствону бир пайдалы тармагъына айлангъан.
Дюньяда балжибин тигип оьлегенлени санаву йылан хабып оьлгенленикинден эсе кёп. Жибинлени татли балы йимик, гючлю агъусу да бар. Бир жибин хапгъанда адамгъа онча зиян да болмай. Тек кёплери тиксе, адам нагагь да сав къалмай. Болса да, жибинни агъусундан санларда болагъан гьар тюрлю аврувларын сав этмеге адам тезден берли уьйренген.
Кюю булан къоллап билсе, жибинлени янгыз балындан къайры, оьзге балавузу, суламасы (прополис), ана сютю, чечек чангы… да савлукъну беклешдирмеге кёп кёмек эте. «Балгьам» деген сёз де бал деген тамурдан яратылгъаны белгили.
