Герменчикдеги «Коммунизм» колхозну председатели алмашынывлар болгъан сонг «Герменчик» СПК-ны ёлбашчысы болуп ишлейгенли 50 йыллар болуп турагъан ва гьали де шо къуллукъну давам этеген биология илмуланы кандидаты Алимгиши Бамматовну гьакъында айрыча эсгермеге тюше деп ойлашаман.
А. Бамматов 1933-нчю йыл Герменчик юртда сабанчы агьлюде тувгъан. Яшлыгъы дав йыллагъа рас гелип, кёп къыйынлыкъланы башдан гечирген. Буса да школада охума ва билимлер алма ол заман ва имканлыкълар тапгъан. Демек, 1950-нчи йыл толмагъан орта билимлеге ес бола ва билим алывун узатмакъ учун Магьачкъаладагъы ветеринарлар гьазирлейген техникумгъа охума тюше. Шо йыл ол Ватаныны алдындагъы борчну кютмек учун асгерге де чакъырыла. Ондан къайтгъан сонг билим алывун давам эте.
Арадан эки йыл гетип, ол ветеринар касбугъа ес бола ва юртдагъы колхозда загьмат ёлун башлай. 1960–1963-нчю йылларда ол районну ветеринар станциясында участка фельдшер болуп да ишлей. Шо йыллар ол ата юртуна къайтып, колхозда ишлеп, оьзюн бажарывлу касбучу гьисапда гёрсете. Юртлу халкъ ону загьматын оьр даражада къыйматлай ва бир гёнгюлден колхозну председатели этип сайлай. Шо бола 1964-нчю йылны февраль айы. Эсгерилген йылдан тутуп ол колхозну экономикасын оьсдюрмек ва юртлу халкъны яшав гьалын яхшылашдырмакъ учун къаны-жаны булан талаша.
Ёлбашчы болгъан сонг билимлерин оьсдюрмек ва камиллешдирмек ону учун биринчи масъала болуп токътай. Шо йыл, демек, 1964-нчю йыл Алимгиши Ставропольдагъы юрт хозяйство институтгъа охума тюше ва ону 1969-нчу йыл тамамлап, оьр билимлеге ес бола. Ону къасты ва гьаракаты булан 1967-нчи йыл колхозда тувар ферма ишлеме башлай. 1973-нчю йыл буса жынслы гьайванлар сакъламакъ учун машинлешдирилген гьайванчылыкъ комплекс къурула. Гьайванчылыкъдан алынагъан гелимлер йыл сайын арта, колхоз оьсе, адамланы яшав гьалы яхшылаша. Шо буса Алимгишини билимлерин дагъыдан-дагъы артдырывгъа талпындыра. 1970-1973-нчю йылларда Ленинград шагьардагъы илму-ахтарыв институтну аспирантурасында охуп, диссертация язып, ону уьстюнлю кюйде якълап, Алимгиши Бамматов биология илмуланы кандидаты деген алим атгъа ес бола.
Юрт хозяйствону оьсдюрювде етишген уьстюнлюклери учун Алимгиши Бамматов Загьмат Къызыл Байракъ орденине лайыкълы бола. Шо буса ону дагъы да оьр натижалагъа етишме талпындыра.
1965-1985-нчи йыллар колхоз ону ёлбашчылыгъы булан лап да яхшы натижалагъа етише. Йылдан-йылгъа социалист ярышны гёчювчю Къызыл байрагъын къолдан чыгъармай алгъа абат алына, колхозчуланы гелимлери арта, юрт тюрлене.
1970-нчи йылдан тутуп, кёп санавда къурулушлар ишлене. Шо санавда маданият къала, колхозну канторларыны, медпунктну, байлавлукъ бёлюкню биналары, эки къабатлы орта школа къурула. Мунда биринчилерден болуп ичеген сувну, табии газны масъаласы чечиле, орамлагъа асфальт тутула, юрт яшнай. Шолар бары да колхозну гючю ону ёлбашчысы Алимгишини гьай этивю булан амалгъа геле.
Терекге емишине, адамгъа буса загьматына гёре багьа бериле. СССР-ни Оьр Советини Президиумуну Указы булан загьмат макътавлугъу учун Алимгиши Бамматов Россия Федерацияны юрт хозяйствосуну ат къазангъан къуллукъчусу деген, Дагъыстан Республиканы ат къазангъан ветеринар врачы деген оьр атлагъа, оьзге орденлеге, медаллагъа, гьюрметлев грамоталагъа лайыкълы болгъан.
Алимгиши Бамматов – оьмюрюню кёп янын юртлуларыны яшавун яхшылашдырывгъа берген адам. Загьмат булан чыныкъгъан, савлай республикагъа загьмат уьстюнлюклери булан белгили болуп тургъан А. Бамматов гьали оьзю ёлбашчылыкъ этип турагъан СПК-ны гьалы йылдан-йылгъа осаллашагъанына теренден талчыгъа. Бугюн СПК-ны атындан къайры заты къалмагъан. Тек ол гележекге инана ва шо СПК-ны аякъгъа тургъузуп, берекетли заманланы къайтара гелтирмекни гьайында.
А. Хамаматов.
Бабаюрт.
Суратда: А.Бамматов.
