Адам иши булан белгили

 

 

Адам ишни беземей, иш адамны безей деген бизин аталаны сыналгъан сёзлери бар. Бу айтыв да оьзю башын тутгъан ишни жаны-къаны булан кютеген, тезден юртда абур да, гьюрмет де къазангъан Тамазатёбедеги почта бёлюкню ёлбашчысы Зумрут Аталыкъовагъа къыйышмай къалмай.

 

Ол почта бёлюкню башын тутагъанлы 13 йыл тюгюл болмаса да, шо аз заманны ичинде ишине бакъгъан жаваплыгъы ва усталыгъы булан халкъны  баракалласын алгъан, разилигин къазангъан. Почта бёлюгю буса юртлулар-дан къайры да, айлана якъдагъы къотанларда яшайгъанланы къуллукъларын да кюте.

– Мени алдыма гьар гюн кёп адам геле. Оланы талапларын кютмек – бизин аслу борчубуз, – дей Зумрут Аталыкъова. –  Бугюнлерде почта бёлюклер янгыз газет-журнал етишдиреген идара тюгюл. Почтада юртлулар электрик токну ва табии газ ягъарлыкъны къоллагъан учун гьакъ тёлемеге бола. Биз пенсияланы да ва оьзге кёмек харжланы да, къайсы-бирин айтайым, посылкаланы, багьалы бандеролланы ва олай башгъа кагъызланы адамлагъа етишдиребиз. Шондан къайры да, налогланы тёлеме гелгенлени къул-лукъларын да кютебиз. Мен заманны бошуна йибермеге  болмайман. Гьар адам оьзтёрече янашыв талап эте. Оланы къуллукъларын тез заманында тетиксиз кютмеге мени борчум деп санайман.

Зумрут Аталыкъова халкъ булан къыйышып бажарагъанны юртлулар тезден биле. Ол оьзю Оразгъулавулда тувса да, мелте чагъындан башлап Тамазатёбеде оьсген. Юртлулар ону яхшы таный ва ишине оьр къыймат бере. Ол 1963-нчю йылда Пезулланы ва Хадижатны агьлюсюнде тувгъан.

Тамазатёбедеги орта школада 8 класны лап яхшы къыйматлар булан тамамлап, 1978-нчи йылда Темиркъазыкъ Осетияны тахшагьары Орджо-никидзе шагьардагъы сатыв-алыв техникумгъа охума тюше. Оьрде эсгерилген охув ожакъны бухгалтерлер гьазирлейген бёлюгюн битдирип, Зумрут юртгъа къайта. Шо замандагъы юртну ортасында ерлешген райпону тюкенинде ишге къуршала. Ишинде бай сынав топлагъан Перзияхан Янгурчиева ва Мадина Гьажиева жагьил къызъяшгъа гьайлы янашып, касбусуну сырларына уьйрете. Шолайлыкъда, 16 йылланы боюнда Зумрут сатыв-алыв тармакъда ишлеп, халкъ арада, эл арада сый да, абур да къазангъан. Алывчуланы талапларын кютмеге белсенип чалышгъан.

2000-нчи йылларда Зумрут агьлюсю булан йыракъ Темиркъазыкъ бойлардагъы Ханты-Мансийскиге гёчюп, шагьардагъы транспорт идарада  бухгалтер касбусун юрютген. Къайда ишлесе де, ол ишине жаваплы янашгъан. Ишиндеги гьаракаты ону жавапсыз къалмагъан. Бу ишде де ол гьюрметлев грамоталар, баракалла кагъызлар ва оьзге савгъатлар алгъан.

Алтын еринде яхшы дегенлей, 2009-нчу йылда Зумрут агьлюсю булан юртгъа къайта. Арадан бир йыл гетип, 2010-нчу йылда ону юртдагъы почта бёлюгюню ёлбашчысыны къуллугъуна белгилей. Ол да оьзюне тапшурул-гъан ишни гьар заманда да тетиксиз, бирев де сёз айтып болмайгъан кюйде кютмеге уьйренген.

Юртлу къатын, загьматны ветераны Аминат Жанхуватова Зумрутну гьакъында макътав сёзлени къызгъанмай:

– Къачан почта бёлюкге барсам да, Зумрут бир кюйде йылы сёзю ва илиякълы иржайыву булан къаршылай. Шо кюйде гьар адамны къуллугъун ва талапларын кюте. Биз де ону иши булан разибиз, ва  оьр къыймат беребиз. Гьар гюн шонча адамны къуллугъун кютмеге де оюн-масхара тюгюл. Почта – юрт ерде герекли ва гьажатлы идара. Бизин юртда почтаны башын тутгъан Пейзулланы къызы Зумрутгъа юртлуланы атындан разилик билдиремен.

«Россияны почтасы» деген идараны янындан Зумрут кёп санавдагъы гьюрметлев грамоталагъа, дипломлагъа, багьалы савгъатлагъа ес болгъан.

Бу йыл июн айда Зумрут Аталыкъова юби­лейин къаршылагъан. Шо агьвалатны гёз алгъа тутуп, Къызлар шагьардагъы почтампны начальниги Омарасгьап Сайитов ону гьаракатын гьюрметлев грамота ва акъча савгъат булан  белгилеген.

Зумрут агьлю якъдан да тюзелген деп айтмагъа болабыз.  Айтагъаным, кёп сююп къошулгъан агьлюсю Къураш булан татывлу ва берекетли ожакъ къургъан. Агьлюде эки къыз оьсген ва тарбиялангъан. Ата-ана олагъа тийишли билимлер де берген. Бугюнлерде олар торунларын тарбиялавгъа, оланы билим алывуна агьамият бере.

 

Бэлла ГЬАЖИГЕЛДИЕВА,

 

Авторизация
*
*
Регистрация
*
*
*
Согласны с условиями сайта?
Генерация пароля