Бары да ерлерде йимик, Къарабудагъгент районну билим берив ожакъларында да янгы охув йылны башланывуна байлавлу шатлыкъ мажлислер оьтгерилди. Къарабудагъгентдеги гимназияны байрамча безенген эркин абзарында шолай мердешли шатлыкъ жыйынланы бириси болду.
Шо гюн савлай районда йимик, савлай республикада да алдынлы гьисапланагъан эсгерилген билим берив ожакъланы бирисинде охувун узатагъан уланлар ва къызлар, билимлени дюньясына башлап абат алажакъ гиччипавлар, оланы муаллимлери, ата-анасы жыйылгъан эди. Школагъа барагъан яшлар учун муаллимлери, къурдашлары булан ёлугъувлагъа алгъасатагъан мердешленген кюйде оьтгерилген инг ярыкъ ва таъсирли шо байрамда ортакъчылыкъ этген кёп санавдагъы къонакълар янгы охув йылны башлангъаны булан къутлап сёйледилер.
Ачыкълашдырып айтгъанда, жыйылгъанланы байрам булан къутламагъа Дагъыстанны маълумат ва печат министри Умаросман Гьажиев, ДР-ни Халкъ Жыйыныны депутаты Магьамматали Адзиев, Къарабудагъгент районну башчысы Магьмут Амиралиев, эсгерилген муниципал къурулувуну жаваплы къуллукъчулары, юртну оьзге абурлу адамлары гелген эди. Оланы къайсыны сёйлевю де торайып гелеген яш наслуну вакиллери учун таъсирли болуп чыкъды.
Инг алда Къарабудагъгентдеги гимназияны директору Адил Салаватов муаллимлени ва охувчуланы къутлай туруп, оланы барысына да устюнлюклер булан бирге, чыдамлыкъ, герти къурдашлар тапмакъны да ёрады.
Шондан сонг Магьмут Амиралиев коронавирус аврувну яйылыву себеп болуп кёп къыйынлы шартларда башдан гечирмеге тюшген оьтген охув йылны эсге алып сёйледи. Тувулунгъан гьал къоллайлашып, гележекде охувчулагъа Интернет байлавлукъну имканлыкъларындан пайдаланып билим алмагъа тюшмежегине инанагъанын билдирди. Школада яшланы янгыз билимлери тюгюл, оланы ругь, хасият къылыкъ битими амалгъа гелегени гьакъда айта туруп, муаллимлеге оьрлюклеге етишмекден къайры да, савлукъ ёрап сёйлевюн тамамлады.
Оьз гезигинде Умаросман Гьажиев де Билимлени гюню уллулагъа яшлыкъны эсге салагъан байрам экенни гьакъында айтды. Оьзю ата юртунда школада оьтген йылларын эсгере туруп, гьар адам да охуйгъан вакътисинде янгыз тенги ёкъ билимлени тюгюл, яшав сынав да топлап чыгъагъанын ташдырды. Ол муаллимлени жамиятны пайдасына тёгеген къыйыны учун да оьзюню разилигин билдирди.
Сёйлевлер тамамланып, байрам яшлар билим алывну сыйлылыгъы гьакъда охугъан шиърулар, кюр йырлар ва къурч бийивлер булан давам этилди. Шо гюн Къарабудагъгентдеги гимназияны абзарында далапчылар гёрсетген акъча маялар харжланып, «Ерли сиптелер» деген проектге гёре къурулгъан футбол майданча да пайдаландырывгъа берилди. Гелген къонакълар буса Къарабудагъгентдеги бир номерли орта школада оьтгерилген байрамда да ортакъчылыкъ этдилер.
