Россияны аманат банкыны Дагъыстандагъы бёлюгюню управляющийи Мурат Идрисов ва республиканы Ич ишлер министерлигини управлениесини къуллукъчусу, полицияны майору Тимур Гьажиев журналистлер булан прес-конференция оьтгерди. Аслу гьалда сёз–телефон сёйлеп, гьилла булан адамланы акъчаларына ес болагъанланы алдын алмакъ учун не йимик чаралар гёрюлегенни гьакъында юрюлдю.
М.Идрисов айтгъан кюйде, адамланы алдатагъан шолай «уручуланы» гьаракаты оьтген йыл булан тенглешдиргенде 10,8 процентге кемиген. Оьзлерден ихтиярсыз адамланы карталарын къоллап акъчаларын алгъан гезиклер 211 минг керен гьисапгъа алынгъан. Урлангъан акъчаны къадары буса 3 миллиардгъа етише. Адамланы акъчаларына ес болмакъ учун шолай «уручулар» ойлашып не тюрлю къайдаланы да къоллай. Аслусу, оьзлер телефон сёйлеген адамны не гьиллалар булан да оьзлеге инандырма бажара ва оьзлеге тарыкъ маълуматланы алмай туруп айрылмай.
Шолайлардан сакъ болма герекни айта туруп, М.Идрисов бу йылны апрель айындан июн айына ерли 117 минг телефон номерлени япгъанын эсгерди.
Т.Гьажиев айтгъан кюйде, бу йылны экинчи кварталында шолай алдатывланы санаву хыйлы кемиген. Алда шолай зенглер Украина бойдан геле болгъан. Хас гьаракатлар башлангъан сонг кемиген. Гьали телефон «уручуланы» зенглери Чехия ва Латвия пачалыкълардан кёп геле. Шону учун да телефонну къоллайгъанлар танымайгъан адам сёйлесе, сакъ болма герек.
