Июль айны 17-синде уьлкени инг бырынгъы шагьарларыны бириси Дербентде хас къайдада Низами Генжевини атындагъы гюлбавда ярыкъ ва макъамлар булан безендирилген уллу фонтанны ачылыву оьтгерилген. Бу шатлы чарада Дагъыстан Республиканы Башчысы Сергей Меликов булан бирче Россияны маданият министри Ольга Любимова, РФ-ни Пачалыкъ Думасыны депутаты Хизри Абакаров ва Дербент шагьарны башчысы Рустамбек Пирмагьамматов да ортакъчылыкъ этген. Олар дёртевю де фонтанны якъгъан.
Фонтан уьлкеде инг уллусу деп гьисап этиле. Ону гьюрметине, ачылывуна багъышлангъан шатлыкъ чарада ортакъчылыкъ этмек учун Москвадан гелген къонакъланы бирлери бу имаратгъа берген оьр къыймат рази къалдыра. Россия Федерацияны Гьукуматыны Председателини заместителлери Александр Новак ва Дмитрий Чернышенко, Россияны Президентини Администрациясыны ёлбашчысыны заместители Магьамматсалам Магьамматов, Россияны Аманат банкыны правлениесини президенти Герман Греф, сенатор Сулейман Керимов, «Газпромнефть» жамиятны генеральный директору Александр Дюков бу гёрмекли имаратгъа уллу иштагьлыкъ булан къарадылар. Бары да гелгенлени санаву – 35-ден артыкъ.
Къонакъланы къаршылагъан сонг Сергей Меликов: «Биз Дагъыстанны янгы тарихинде гележекде де Дербент булан оьктем болурдай имарат ачабыз. Дербент – Дагъыстанны тарихини, савлай уьлкебизни де танажар бюртюгю, къонакъланы кёп сюеген, халкъы да гишиге яхшылыкъ этме гьасирет инг къыбла шагьар», – деп баянлыкъ этген.
«Дагъыстанда аманлыкъ бар, биз бары да къонакълагъа эшиклерибизни ачабыз. Бу байрам учун сенатор Сулейман Абусайитович Керимовгъа, Пачалыкъ Думаны депутаты Хизри Магьамматович Абакаровгъа айрыча баракалла билдирме сюемен. Озокъда, Аманат банкны правлениесини президенти Герман Греф ва ону эки янындагъы адамларсыз да бу иш бажарылма болмай эди. Россияны Гьукуматына да разилик билдирме сюемен. Гьукуматны Председателини заместителлери Дмитрий Чернышёвгъа ва Александр Новакгъа да бугюнгю байрамыбызда ортакъчылыкъ этгени учун баракалла», – деп билдирген С.Меликов.
Дербентлилени бу гёрмекли агьвалаты булан Россияны маданият министри Ольга Любимова, Пачалыкъ Думаны депутаты Хизри Абакаров, Аманат банкны правлениесини президенти Герман Греф, Дербент шагьарны башчысы Рустамбек Пирмагьамматов да къутлагъан. Оьзге къонакълар да чыгъып сёйлегенлер.
Россияны интерактивный фонтанларыны арасында Дербентде къурулгъан фонтан – 23-нчюсю. Олай фонтанланы Аманат банк 2016-нчы йылдан берли къурма башлагъан. Энни оланы арасына Дагъыстан Республиканы Дербент шагьары да къошула. Инг аслусу, Дербентдеги шолай фонтанлардан гиччиси тюгюл –инг уллусу.
Набиюлла МАГЬАММАТОВ.
