Регионну ёлбашчысы Сергей Меликов май айны 10-нда, Дагъыстан Республиканы Башчысыны янында къаравулланмагъан гьалланы алдын алмакъ ва ёрукълашдырмакъ учун къурулгъан комиссияны генгешин оьтгерген. Генгешни ача туруп, С.Меликов яз вакъти от тюшювден сакъланмакъ учун гьазирлик болма тарыкъны айтгъан ва Красноярск крайда тувулунгъан гьал шо ёрукъда мекенли ойлашдырагъанны эсгерген.
От тюшюв – бек зараллы хатабалагь. Масала, Красноярск крайны 827 къурулуш биналары яллап ёкъ болгъан. Оланы арасында 500-ден де артыгъы – адамлар яшайгъан уьйлер. Етти адам оьлген, тютюнден тыныш алып савлукъларына зарал гелтиргенлени чи санап айтма да къыйын.
Бизин республикада да 2010-нчу йылдан бери якъгъа 11 от тюшюв болгъан деп гьисапгъа алынгъан. Хатабалагьланы вакътисинде 369 уьй яллагъан ва 1770 адам уьйлери булан бирче мал-матагьындан да магьрюм къалгъан. Заралны харж янын ахтаргъанда, ону багьасы 700 миллион манат болуп токътай. О гьакъда генгешде айта туруп, Россияны МЧС-ини Дагъыстан Республикадагъы Баш управлениесини начальнигини заместители Сабир Магьмутов эсгерген кюйде, от тюшювден сакъланмакъ учун гьар юртда бир пожарный бёлюк къурма бажарылмай. 3, 4, 5 юртну къуршайгъан кюйде шо къуллукъну яшавгъа чыгъарма буса имканлыкъ бар.
Бирдагъы янындан, ерлерде от тюшювден сакъланывну гёнгюллю къайдада иш гёреген гьаракатчы адамланы къуллугъу да бек агьамиятлы. Шону учун да Дагъыстанда гёнгюллю от сёндюрювчюлерден 10 ерде айрыча «пожарный постлар» къурулгъан.
Генгешде бирдагъы бир къыставуллу гьал тувдурма болагъан масъалагъа да тергев берилген. Язбашда сув алывну заралын кемитмек учун болдурулма герекли къуллукъну аслу янларын токъташдырмакъ ва шо ёрукъда иш гёрмек агьамиятлы. О гьакъда Россияны МЧС-ини Дагъыстан Республикадагъы Баш управлениесини начальнигини заместители Муслим Девришбеков эсгерген кюйде, табиат шартлагъа гёре сув алывну хатабалагъы тийме болурдай Бабаюрт, Къызлар, Хасавюрт ва Къызылюрт районланы гьазирлик болдурув къуллукълар кютеген идараларыны ишлери тергелген.
Бу масъаланы айланасында Дагъыстан Республиканы табиат байлыкъларыны ва экологиясыны министри Ибрагьим Ибрагьимов да, Къызылюрт районну башчысы Рустам Татарханов да генгешде чыгъып сёйлегенлер.
Министр билдирген кюйде, Терик оьзенден гелме болагъан ташгъынны сакъланмакъ учун ишлер этилген. Ахты районну Ахты юртун да Самур оьзенден гелме болагъан къоркъунчлукъдан сакъламакъ учун бир къадар чаралар гёрюлген. Шо ишлени юрютмек учун харж федерал бюджетден гёрсетилген акъчалардан алынгъан. Шолай да, Бабаюрт, Къызлар районларда да этилген ишлер бар.
Рустам Татарханов билдирген кюйде, буссагьатгъы вакъти темир ёлну къырыйындагъы Солтан Янгыюртну бир боюнда Солакъ оьзен хатабалагь гелтирме болур йимик ерлени бегитмек учун да гьазирлик юрюле. Ондан къайры да, Чиркей ГЭС-ни сув жыйылагъан кёлюню суву артып йиберсе, ону заралы Къызылюрт, Хасавюрт, Бабаюрт районланы юртларына да къоркъунчлукъ гелтирме бола.
Сергей Меликов генгешни тамамлай туруп, табии хатабалагьланы алдын алмакъ учун этилме герекли гьаракатны бек умпагьатлыгъыны ва тарыкълыгъыны гьакъында эсгерген.
Набиюлла МАГЬАММАТОВ.
