Белгили экени йимик, сакъатланы «Язбаш» деген жамиятыны ял алыв базасында Донбас бойда юрюлеген хас асгер гьаракатны ортакъчыларыны савлугъун беклешдирмек учун тийишли онгайлыкълар болдурулгъан.

Шо гьакъда айта туруп, бизин республикада биринчилерден болуп эсгерилген сиптени яшавгъа чыгъармакъ учун жамиятыны ёлбашчысы Али Мусаев кёп иш этгенин айрыча айтмагъа тюше. Озокъда, республиканы гьакимлик къурумларыны жаваплы къуллукъчуларыны янындан да ол шо гьаракатында мекенли кюйде якълав таба. Алдагъы гюнлерде ДР-ни маълумат ва печат агентлигини ёлбашчысы Абдуразакъ Жамалутдинов шо базада болуп, эсгерилген жамиятына къуршалгъанланы Ватанны Якълавчусуну гюню булан къутлагъан. Шо гьаракатгъа Украинада юрюлеген хас асгер гьаракатда ортакъчылыкъ этип, бугюнлерде къысгъа болжалгъа уьйлерине гелген уланлар да чакъырылгъан эди.

Инг алда ол Дагъыс­танны маълумат ва печат агентлигини жаваплы къуллукъчулары булан бирче эсгерилген базада яшавлукъ онгайлыкълагъа гьажатлы адамлар учун мекенли къурашдырмакъ ва тийишли кюйде ясандырмакъ учун не къадар гьаракат болдурулгъанына тергев берди.

Шондан сонг, Абдуразакъ Жамалутдинов бизин республиканы ёлбашчысыны атындан исси ашлар булан тюрленген тепсини айланасында жыйылгъанланы байрам булан къутлады. Шону булан бирге, «Язбаш» деген сакъатланы жамияты ону ёлбашчысы Али Мусаев булан бирче савлай жамиятгъа пайдалы ишни яшавгъа чыгъармакъ учун белсенгенин эсгерди. Ону сёзлерине гёре, Украинада юрюлеген хас асгер гьаракатны вакътисинде яра тийип уьйлерине къайтмагъа борчлу болгъан уланланы савлугъун ­беклешдирмек бек агьамиятлы ишлерден гьисаплана.
Шону гёз алгъа тутуп, ол Али Магьамматовичге ва шо ишге бары да къуршалгъанлагъа оьзюню разилигин билдирди. Сонг да, не тюрлю къыйынлыкъланы, сынавланы башдан гечирсе де, бир де къайпанмай, ким де сукъланардай асгер къуллугъун кютюп, ватанын якълайгъан арабыздан чыкъгъан уланлар гьакимлик къурумланы янындан гьар заманда да якълав табажагъын ташдырды.

Къарабудагъгент район­ну Уллубийавул юртуну ювугъунда денгизни ягъасындагъы ял алыв база, оьрде де айтылгъанда йимик, Али Мусаевни сиптечилиги булан къурулгъан. Бугюнлерде ол сакъатланы гьар гюнлюк яшавлукъ масъалаларын чечивге болушлукъ этегенинден къайры да, ДР-ни маълумат ва печат агентлигини ёлбашчысыны жамият кёмекчисини къуллугъуна да гёнгюллю кюйде къуршалгъан.

Ол билдиргени йимик, бир нече йыл алъякъда шо ял алыв базаны къурмакъ учун топуракъ гёрсетилген сонг, далапчылар, олай да шабагьатлы кёмегин болдурагъан оьзге мадарлы адамлар гёрсетген акъча маялар харжланып, ял алыв база ишге салынмакъ учун мекенли гьаракат юрюлмеге башлангъан. Артдагъы вакътилерде Дагъыстанны Башчысыны грантлары гьисапда гёрсетилген акъча маялар да шогъар мекенли кюйде къошум этип геле. Бугюнлеге ерли кёп иш этилген. Гележекге гёз алгъа тутулгъан ишлер дагъы да кёп. Барысы да шолар ювукъ вакътини ичинде яшавгъа чыгъажакъгъа умут да бар.

Буссагьатгъы вакътиге Украинада юрюлеген хас асгер гьаракатда ортакъчылыкъ этген 500-ден де артыкъ адам мунда язяй айларда ял алмагъа болардай шартлар яратылгъан. Олардан къайры да, базагъа ял алмагъа ювукъ адамлары да гелмеге бола.

Яхшылыкъгъа алгъаса дейлер. Шо гюн де ДР-ни маълумат ва печат агентлигини ёлбашчысы Абдуразакъ Жамалутдинов, гертилей де, савлугъу себеп болуп, яшавлукъ онгайлыкълагъа артыкъ гьажатлы адамланы гёнгюн алмагъа алгъасады. «Язбаш» деген сакъатланы жамиятына савгъатгъа уллу телевизор да тапшурду. Къарабудагъгентдеги мердешли маданиятыны район ­центрыны солисти Абдулазим Найипханов ва къакъашуралы йырав Нюрияханым Умарова да оьзлени йырлары булан жыйылгъанланы гьар заманда йимик къурчун къандырды.