Хасавюрт районда 1-нчи сентябрде 4 юртда янгы школа ачылды. Эндирейдеги 2 номерли школаны ачылывунда Дагъыстанны билим берив ва илму министрини борчларын заманлыкъгъа кютеген Ягьия Бучаев ортакъчылыкъ этди.
Жыйылгъанланы алдында сёйлей туруп, Хасавюрт район администрацияны башчысы Жамболат Салавов Хасавюрт районда 53 школа, бирер школа-интернат ва къошум билим береген къурум, шолай да 13 яшлар баву барны эсгерди.
–Хасавюрт районда бугюн 28026 яш охувларын башлай, шолардан 3300-вю – школагъа биринчи барагъан гиччипавлар, – дей Ж.Салавов. – 4 юртда – Акъболатюртда, Кемсиюртда, Къандавуравулда ва Эндирейде 840 яш гьалиги талаплагъа жавап береген янгы школалагъа баражагъы барыбызны да сююндюре. 20 йылдан да артыкъ Эндирейдеги 2 номерли школа яшланы такъта биналы школада 3 сменде охутуп турду. Гьали 300 яш генг ва ярыкъ кабинетлерде охума, уллу китапханасындан тарыкълы китаплар алма, спорт ва актовый залларда, спорт майданчаларда тюрлю-тюрлю чаралар оьтгерме, дарсдан сонг оьзлени юреги ушатагъан кружокларда машгъул болма имканлыкъ яратылгъан. Бизин тилевюбюзню къабул этип, шу школаны къурмагъа имканлыкъ берген Дагъыстанны Башчысыны борчларын заманлыкъгъа кютеген Сергей Меликовгъа ва школаны къургъан къурулуш компаниягъа гиреген «СМК Жильё» деген ООО-ну директору Али Алиевге гьакъ юрекден баракаллабызны билдирме сюебиз.
Ягьия Бучаев де охувчуланы ва оланы ата-аналарын Сергей Меликовну атындан янгы охув йыл булан къутлады, янгы школалар къурув Дагъыстанны Башчысыны аслу борчларыны бириси экенни айтды.
–Янгыз 3 йылны ичинде Хасавюрт районда янгы 3 яшлар баву ва 7 школа ачылгъаны да шону исбат эте, – дей Я.Бучаев. – Районну башчысы айтагъан кюйде, йылны ахырына дагъы да 2 школа ва 2 яшлар баву къурулуп бите. Райондан дагъы да 14 школа къурмагъа тапшурув алгъанбыз, шолар да гезиги булан яшавгъа чыгъарылажакъ.
Ондан сонг сёйлеген яшланы ата-аналары да школаны къургъанлагъа баракалла билдирди.
Къызыл лента гесиле ва яшлар, оланы ата-анасы ва къонакълар янгы школагъа гире ва айланып чыгъа. Школа айтма сёз тапмасдай мукъаятлы къурулгъан, мунда янгы даражада этилинген ашхана, медицина кабинет, генг, ярыкъ ва интерактив доскалары булангъы кабинетлер, спорт булан машгъул болуп битгенде киринме-жувунма болагъан ерлер, юрюме савлугъу ёкъ яшлар учун экинчи къабатгъа минмеге лифтлери булангъы школа тамашагъа къалдыра ва шулай школада осал охума ярамас деген ой геле.
1-нчи сентябрде Хасавюрт районда янгы школалар дагъы да 3 юртда ачылды. Кемсиюртдагъы 120 яшгъа ери булангъы школаны ачылывунда ДР-ни Гьукуматыны председателини 1-нчи заместители Нюрсет Омаров, Къандавуравулда – ДР-ни билим берив ва илму министрини 1-нчи заместителини борчларын заманлыкъгъа кютеген Магьаммат Абидов ва Акъболатюртда – экономика министри Руслан Алиев ортакъчылыкъ этдилер.
***
Шо гюн Россияны Президенти В.Путин булангъы ВКС-де де ДР-ни Башчысыны борчларын заманлыкъгъа кютеген Сергей Меликов Эндирейдеги 2 номерли школадан таба ортакъчылыкъ этди.
