Янгыкъаягент

Янгыкъаягентде районну жагьиллерин армиягъа узатывгъа байлавлу чаралар оьтгерилди. Шо жавап­лы агьвалатда ра­йонну гьакимият ва жамият къурумларыны вакиллери ортакъчылыкъ этген.

Районну башчысы Магьаммат Элдарханов асгерге къуллукъ этмеге барагъан яшлагъа насигьат сёзлерин айта туруп:« Арек­лерде анадаш ерлеригизни ер этмежегигизге, Ватанны алдындагъы борчугъузну намуслу кюйде кютежегигизге инанаман ва уьйлеригизге эсен-аман къайтмакъны ёрайман», – деп эсгерген.

Белгили кюйде, гьали асгерге чакъырагъанлар армияда бир йыл къуллукъ этежек ва олар Украина бойда оьтгерилип тура­гъан хас чаралагъа къуршалмажакъ.

Къарабудагъгент

Къарабудагъгентде янгы жумамежит къурма токъташгъанлар. Бу юрт Дагъыстанда лап да уллу юртлардан бири гьисаплана. Артдагъы маълуматлагъа гёре Къарабудагъгентде 20 мингден де артыкъ адам яшай.

Озокъда, алдагъы заманларда къурулгъан жумамежити намазгъа жыйыла­гъанланы барын да къабул этип болмай.
Оьзю межит де юртну лап бийик еринде ерлешген. Къырыйында ватандашлагъа теле ва радио берилишлеге къарама ва тынглама, Интернетни къоллама имканлыкъ береген бийик темир чарлакълар да бар.

Районну гьакимияты янгы жумамежитни башгъа ерге чыгъармакъны гёз алгъа тутгъан.

Буйнакск

Буйнакск районну башчысы Уллубий Ханмурзаевни сиптечилиги булан Украина бойдагъы хас чараларда жанын къурбан этген асгерчилени яшлары Грозный шагьардагъы дельфинарийге баргъан.

Яшланы кёбюсю хоншу республикада алда бир де болмагъан. Сапар оланы гьайранлыкъгъа къалдыргъан, эсинден таймасдай агьвалатгъа айлангъан.

Лап да гьакъыллы деп гьисапланагъан денгиз жанлар гелген яшланы алдында бары да гьюнерлерин гёрсетген. Гьатта бизин милли макъамла-рыбызгъа гёре бийиме де бийиген. Яшланы арасындан лап тавакаллылары дельфинлени аркъасына минип юзюп де чыкъгъан.

Сапарыны ахырында яшлар «Мычыгъышны юреги» деген межитге баргъанлар.

Бабаюрт

Москвада А.Бакулевни атындагъы белгили медицина центрда жагьил алимлени гезикли Бютюнроссия конференциясы оьтгерилген.

Конференцияда Бабаюрт район азархананы кардиологу Бурлият Исламова ортакъчылыкъ этген. Оьзю Бурлият айтгъан кюйде, шо чарада оьзюне хыйлы сынав алмагъа имканлыкъ болгъан. «Магъа уьлкени юрек аврувланы багъагъан лап белгили кардиологлары ва хирурглары булан гьакълашмагъа насип болду. Олар магъа хыйлы насигьатлар берди», – дей ол.
Бурлият Исламова – жагьил кардиолог.Ол Ставрополь медицина институтну алтын медальгъа битдирген. Охувундан сонг анадаш районуна къайтгъан ва гетген йылдан тутуп район азарханада ишлеп тура.

Чонтавул

Каспийскиде гюнтувуш ябушувланы республика чемпионаты тамам-лангъан. Ярышларда Дагъыстанны гьар тюрлю шагьарларын-дан ва районларындан гелген 250 спортсмен ортакъчылыкъ этген.

Шо тогъатартывларда Къызылюрт райондагъы Чонтавул юртну яш вакиллери айрокъда гёрмекли натижалагъа етишген. Ачыкъ этип айтгъанда, чонтавуллу Магьаммат Айболатов, Абдулла Умаров, Астемир Аскеров, Эмирхан Къазиханов, Акъай Акамов, Сиражутдин Гьакимов, Магьаммат Шепиев ва Азизбек Ибракъов биринчи ерлени къазангъанлар.
Яшланы юртда гюнтувуш ябушувланы сырларына тюшюнме тренери Ады Исаев уьйрете.

Къоркъмаскъала

Милли мердешлени сакъламакъны мурадында Хумторкъали районну маданият управлениеси «Мени халкъым» деген фестиваль оьтгерген. Бу чарадан ягъада районну бир къумукъ юрту да къалмагъан.

Гьар юрт фестивальгъа алданокъ гьазирленген программасы булан гелген. Олар жыйылгъан хыйлы къаравчуланы къызны гелешив, той, яшны бешикге салыв, булкъа ва оьзге адатларыбыз булан ювукъдан таныш этген.
«Мени халкъым» деген фестиваль районда гележекде де узатылып туражакъ.