Бугюнлерде Россияны Президенти В.Путинни билдиривю булан армияны сыдраларын янгы адам гюч булан толумлашдырмакъ учун ватандашланы асгер къуллукъгъа ча­къырылыву – халкъ арада инг де кёп тергев берилеген масъала. О гьакъда гьар тюрлю пикрулар да юрюле. ­Республикада, регионну оьзге ерлеринде йимик, асгерге чакъырывну якълайгъанлар булан бирче ону тюз англамайгъанлар да арагъа чыгъа.

Военкоматланы ва муниципалитетлени янындан масъаланы чечиливюне байлавлу низамлы англатыв иш етишмеген ерлерде халкъ арада пелекет тюшме де бола. Шолай гьаллардан сакъланмакъ учун ва регионда асгерге чакъырылыв иш кютюлме тарыкъ даражада юрюлсюн учун, Дагъыстан Рес­публиканы Башчысы Сергей Меликов Магьачкъалада хас генгеш оьтгерген.

Генгешни ача туруп, республиканы Башчысы: «Гетген жума мен Оьрбашкомандующий оьзюню Указына гёре асгерге чакъырывну гьакъында миллетге этген билдиривюне байлавлу юрюлежек чаралар къатты кюйде низам сакъланып оьтгерилсин деген масъаланы сизин алдыгъызгъа салгъан эдим, тек кёплеригиз мени англамагъансыз», – деп билдирген. Ол эсгерген кюйде, асгерге чакъырыв къуллукъну, военкоматланы ва бир-бир муниципал башчыланы уьстденсув англавуна гёре тийишли кюйде юрютме башламагъан. Шо буса адамланы янындан бир тюрлю ра­зисизликлер тувдургъан. Уьлкедеги гьалны четимлешдирмек учун гьаракат юрютеген жинаятчы группалагъа шолай гезиклер ­онгайлыкълар гелтире.

Ерлердеги гьакимлеге буса ол: «Уьлкени якъламакъ учун гьар ким оьзюню еринде пайдалы къуллукъ кютме тарыкъ. Шо къуллукъну кютюп болмай бусагъыз, халкъ булан ишлеп билмей бусагъыз, военкоматлагъа барып арзалар беригиз. Шолай сама да Ватангъа пайда гелтирерсиз», – деп тапшургъан.

Генгешде Дагъыстан Республиканы вице-премьери Рамазан Жафаров билдирген кюйде, респуб­ликаны военкоматларыны алдына запасдагъы асгер къуллукъчуланы асгер касбуларына гёре нечик ча­къырыв юрютме герек экенни масъалалары салынгъан.

Дагъыстан Республиканы Башчысыны ва Гьукуматыны Админист­рациясыны ёлбашчысы Алексей Гьасанов генгешде берген англатывлагъа гёре, асгерге чакъырывну биринчи гюнлеринден башлап асгер комиссариатланы янындан халкъгъа англатыв иш юрюле. Шо къуллукъ бир-бир комиссариатланы янындан тындырыкълы юрюлмегени саялы, ондан къайры да Интернетден таба ялгъан маълуматлар къолланагъаны учун, халкъны рагьатсызландыра­гъан гьаллар тувулунгъан.

Муниципалитетлени башчыларына да республиканы Башчысы: «Халкъны ва Ватанны алдындагъы борчланы кютмек учун, герек болса, гече де, гюн де токътап, бугюн гьар-бир ёлбашчы оьзюню еринде болма тарыкъ», – деп билдирген.

* * *
Сентябр айны 28-нде Дагъыстан Республиканы Башчысы Сергей Меликов оьзюню телеграмм-каналында:

«Эртенокъ дагъыстанлыланы асгерге чакъырагъан пунктда болгъан эдим. Мунда республиканы гьар тюрлю ерлеринден гелген жагьиллер бар. Булар гьали мени армия къардашларым, асгер къуллукъгъа гьазирленип тура. Олар Каспийск флотилияны сайламлы полкунда къуллукъ этежек. ­Оьзлер сююп гелгенлер. Бирлери булан сёйледим. Къатты уланлар, къайда барагъанын да биле, яхшы ругьу да бар», – деп билдирген. Ол эсгерген кюйде, бары да чакъырылагъанлар тарыкълы болагъан чакъы зат булан таъмин.