Огь, жагьиллик! Адамны шо чагъына етеген не бар! Айтагъаным, шо йылларда санларынг кюр экенге, къанынг ташып агъып, юхунг битгинчеге, танг белгиси билингенчеге де уянасан. Эртенлер терезенгни шишасындан гирип гелип, уьйню йыртыллатып къоягъан гюнню шавлалары да, гёк боявгъа боялгъан дазусуз кёкню энгинде астаракъ юзеген булутлар да гёнгюнгню хошландыра.
Жагьил уланланы ва къызланы гележеги яхшы болсун учун кёп иш этилегенин де бир де инкар этмеге ярамай. Янгы къурулгъан жагьил агьлюлеге, оьзлени яшавлукъ шартларын яхшылашдырмакъ учун, ипотеканы имканлыкълары булан пайдаланмагъа ёллар ачыла.
Нечик алай да, бугюнлеге ерли гьакимлик къурумланы янындан жагьиллени алдында токътагъан масъалаланы чечивге, таман чакъы болмаса да, бир къадар агьамият берилип геле. 1993-нчю йылны январ айны 24-нде Россияны Президенти къол салгъан къараргъа гёре бизин уьлкеде гьар йыл мердешли кюйде Яшёрюмлени гюню белгиленегени де шону исбатлай. Гьар тюрлю къуллукъларда ишлейген жагьил чагъындагъы адамланы, оьр ва орта хас билим алагъан студентлени къуршав булан фестиваллар оьтгериле. Сонг да, жагьил адамлагъа билим алмагъа ва гьар тюрлю касбулагъа ес болмагъа бары да шартлар яратылгъан деп айтмагъа бажарыла.
Гертиси, буссагьатгъы вакътиде яш наслуну вакиллерине оьзлер ес болгъан гёнгю алагъан касбулагъа гёре ишлер тапмагъа кёп къыйын. Шогъар да къарамайлы, жагьил уланланы ва къызланы аслам пайы, терс ёллагъа тюшмей, охумагъа да, ишлемеге де къаст этелер. Оьзлер гьазирлеген агьамиятлы сиптелени арагъа салып, республиканы, олай да уьлкени оьлчевюнде гьар тюрлю министерликлени, ведомстволаны якълаву булан юрюлеген къаравларда жагьлы кюйде ортакъчылыкъ эте, шолайлыкъда кёп-кёп проектлени яшавгъа чыгъарып геле. Табиатны аламатлары булан тенглешдиргенде, язбашгъа парх береген шо яш чагъы булан юрекдеги кюрлюк бир де гене къайтып гелмейгенин англаса да, гьар къайсыны да яшав ёлун белгилейгенин гьис эте.
Шону гёз алгъа тутуп, халкъыбызны асил мердешлерине амин кюйде къалып, оьзюгюзню билимлеригизни, бары да гючюгюзню, яратывчулукъ пагьмугъузну, тувуп оьсген ата юртугъузну, элигизни пайдасына бакъдыражакъгъа гьакъ юрекден инанабыз. Яшлыкъны, жагьлыкъны, кюрлюкню байрамы – Россияны яшёрюмлерини гюню булан къутлай туруп, яшавугъузда сизин учун яхшылыкъланы арты бир де уьзюлмесин, юрекге тутгъан бары да негетлер тюзелип, савлукъда оьмюр сюрмеге насип болсун деп айтмагъа сюебиз. Шону булан бирге, Яшёрюмлени гюнюнде сизин гьюрметигизге юрюлген байрам чараларда, ачыкълашдырып айтгъанда, концертлерде, спорт ярышларда кёп сююп ортакъчылыкъ этгенигизге де бир де шеклик этмейбиз.
