Хасавюрт районну Кёстек юртунда муаллим болуп ишлейген Супуяханым Бийболатованы да «Паху ва Чарах» деген янгы шиъру китабы артдагъы гюнлерде басмадан чыкъды. Ол оьзю хыйлы йыллар муаллим болуп ишлесе де, яшдан берли гьашыкъ болгъан поэзияны тармагъында да чалыша.
Янгы чыкъгъан китаплардагъы шиъруланы охувчуланы тергевюне беребиз.
ЮРЕГИМНИ УРУВУНА ТЫНГЛАСАМ
Юрегимни урувуна тынгласам,
О атыла атынг айтып бир тынмай.
Гёзлерим де сени излей дёрт якъдан,
Сени эсгермей бир абатым алынмай.
Ахшамларда сен ёкълукъгъа къарамай,
Бир ай чыгъа, бир де буса яшына.
Сюемен деп айтып мени сюйдюрюп,
Агъу къошуп къойдунг мени ашыма.
Менде сююв – уллу оьзен, арты ёкъ,
Ягъалардан юрюп, башын тапмайман.
Халта-хулта, ташлар бузгъан аягъым,
Тек мен буса гечив излеп ялкъмайман.
Гечив тапсам, сен гечер деп умут бар,
Не этсем де юрегимде сёнмейген.
Оьзюнг сингген ойларым бар бек авур,
Сюювюм бар, йыллар бою дёнмейген.
Я, гел хари! Эшитмейми юрегинг
Сав аламгъа сес береген сесимни.
Сюювюнге сююв булан сесленген
Алып къойдунг сен чи мени эсимни.
ДЮНЬЯБЫЗНЫ АЯМАГЪА КЪАРАЙЫКЪ
Дюньябызда аччы хабар гьар гюнлер:
Бир ерлерде самолётлар атыла,
Оьлгенлени битгенчеге унутуп,
Башгъа ерде сувтюп геме батыла.
Газ чыкъгъандан гьава етмей къысылып,
Нече юзлеп халкълар бирден бувула,
Онча артыкъ суву да ёкъ оьзенлер
Бирден ташып, дамбалагъа тыгъыла.
Ёкъ, тыгъылмай, алып гете оланы,
Кёпню гёрген кёпюрлени ёкъ эте.
Адамланы, палтарларын, уьйлерин
Бирден-эки ерни булан тенг эте.
Бир ерлерден ерни ярып атылып,
Вулкан чыгъып ютуп къоя юртланы.
Оьрден гелген буз гесеклер дёгереп,
Сюрлюкдюрюп гете бир тав сыртланы.
Сурат йимик, адам къарап турардай,
Уьйлер къала агъым сувну тюбюнде.
Тенгиримни чыкъгъанмы экен ачуву
Дюньядагъы пасатлыкъны кёбюнден.
Къайда бакъсакъ, гьаясызлар бар ерде
Гёк терезе гёрмегенинг гёрсете.
Ярты-юрту ябып гьар-бир санларын
Ал чы сен бил, сагъа гьакъыл уьйрете.
НЕГЕ?
Не тамаша башмайыма гюч эте
Дюньялагъа Адам нечик гелгени.
Къабургъадан яралгъаны Гьаваны.
Халкълар нечик тилни, сёзню билгени.
Нечик топуракъ парх-пархына ярылып,
Денгиз сувлар кёп ерлени алгъаны.
Бар деген бар мол къыр жанлар къырылып,
Ерни юзюн бузлар къуршап къалгъаны.
Шо заманда Аллагь оьзю буюруп,
Инсан къавум тирилгени, оьсгени.
Заман гелип, отну билип адамлар
Чий этлени ашамакъдан кюсгени.
Ругьу оьсме башлагъаны адамны,
Уьстге опуракъ, турма уьйлер этгени.
Алышына туруп девюр, заманлар
Алам ярып, космосгъа да етгени.
Уьйренгени чалт-чалт гьисап этмеге,
Йыракъны да тартагъаны ювукъгъа.
Сибирде де къурагъаны шагьарлар,
Къарамайлы къыркъ градус сувукъгъа.
Бар зат арив-яшав майдан генглеше,
Амма бир зат къоймай мени ял тапма.
Тонлап ашлыкъ тёге бирев денгизге,
Башгъа бирев экмек излей бир хапма.
