Бугюнлерде спортну тутушуп ябушув журасындан Венгрияны Будапешт шагьарында оьтгерилген дюньяны чемпионатына барыбыз да телевизордан къарадыкъ. Бу чемпионат сентябр айны 16-сындан 22-сине ерли узатылды. Биз де билеген кюйде, тутушуп ябушув Олимпия оюнлагъа къошулмажакъ деген хабар яйылгъанда, белгили спортсменлерибиз шогъар къаршылыкъ билдирип, разисизликлер тувгъан эди. Бирлери гёнгюлсюз болуп, гьатта Олимпиадада къазангъан алтын медалларын къайтармагъа да гьазир эдилер. Амма биз де къабул этмеген шо хабар кёп узакъгъа бармады.

Айтагъаным, шо спортну Олимпия оюнлардан тайдырма герек деген Халкъара олимпиада комитетни къарарына да къарамайлы, Буэнос-Айресде шо комитетни 125-нчи сессиясыны натижаларына гёре спортну тутушуп ябушув журасы 2020-нчы ва 2024-нчю йылланы Олимпия оюнларыны программасына гирген.

Дюньяны чемпионатыны биринчи гюнюнде бизин спортсменлер уьч бронза медаль къазандылар. Оланы арасында биз бирдагъы алтын медаль алып гелер деп умут этеген Нариман Исрапилов да бар. Буюрмагъан буса ярай дагъы. Болса да, уьч­юнчю ерни алгъанлыгъы да бизин учун аз уьстюнлюк тюгюл. Ол оьзюню баянлыгъында да булай англатыв берди:

–Мен дюнья оьлчевюндеги ярышларда биринчи керен ортакъчылыкъ этемен. Шо саялы да медаль къазанмакъ – мени учун бир оьрлюк. Озокъда, биринчи ер учун къасткъылдым, тек пайда болмады. Не буса да, бир зат етишмейгенде йимик эди. Хаталарым да болду. Тюзю, биринчи ябушувумдан башлап тынч болмады. Алданокъ юрюлген ябушувларым да къыйын болду. Финалгъа чыкъгъанча эс тапмагъа, оьзюмню жыйма заман къалмады. Танапусгъа йимик берилген он минутну ичинде не этип боласан дагъы? Бираз заман къошгъан буса да ярай эди. Гертиси, тренерим мен бойнума алтын медаль тагъар деп инана эди. Амма ол турнирни натижалары булан рази къалды.

Ол эсгерген кюйде, дюньяны чемпионаты башлангъанча гьазирлик гёрегенде, санларыны бир нече еринден авуртдуруп, оланы кюйге гелтирме тюшген.

Бу чемпионатда Россияны командасына биринчи алтын медальны 60 кило авурлукъда Бекхан Гойгереев гелтирди.

–Мен бек шатман,–деген Б.Гойгереев «Известия» газетни мухбирине.–Мени учун жаны авругъан дос-къардашыма, ювукъларыма ра­зилик билдиремен. Ондан къайры да, оьзюмню тренерлериме, уьлкени Президенти В.Путинге бизин спортну якълайгъан саялы кёп уллу баракалла билдиремен.

120 кило авурлукъда алтын медальны Олимпия оюнланы чемпиону Гьажимурат Гацалов, оьзю булан тогъа тарт­ма чыкъгъанлагъа бир имканлыкъ да бермейли, барысын да утуп, лап сыйлы савгъатны къазанды. Гьатта ахырынчы ябушувда да украинли Ален Засеевни аз заманны ичинде, 7:0 булан утуп, ону сыртын халиге япады. Гь. Гацалов бизин Али Алиев йимик дюньяны беш керен чемпиону болду.

Суратда: Н. Исрапиловну ябушагъан вакътиси.