Оьтген талатгюн, март айны 12-синде, Красноярск шагьарда XXIX Бютюндюнья къышлыкъ универсиада тамамланды. Биз алда да билдирген кюйде, студентлени арасында юрюлеген мердешли шо ярышлар бизин уьлкеде биринчилей болуп оьтгерилди. Демек, 11 гюнню узагъында спортну гьар тюрлю къышлыкъ жураларындан юрюлген ярышларда жагьил экенге оьзлени жагь гьис этеген 58 пачалыкъдан гелген яш спортчулар оьзлени чатлыгъын да, жагьлыгъын да, чыдамлыгъын да исбат этди.
Универсиада юрюлеген гюнлерде спортчулагъа, озокъда, уьстюнлюкню, оьр болув булан бирче утулувну, тюп болувну да сезмеге тюшдю. Гьар не ярышланы барышында да тап шолай бола: биревлер ута, биревлер утула. Тек, бир де къопдурувсуз айтгъанда, оьтгерилген универсиадада оьр даражадагъы натижаларын гёрсетип болмай къалгъанланы арасында да утдургъанлар болмады. Шо гьакъда ону ортакъчылары да, оьр гьакимлик къурумларыны вакиллери де бир гёнгюлден айтып турдулар. Неге тюгюл де, XXIX Бютюндюнья къышлыкъ универсиада инг алда спортчуланы арасындагъы дослукъгъа, татывлукъгъа ёл ачды.
Россияны Гьукуматыны Председатели Дмитрий Медведев де универсиаданы ябылывуна байлавлу шатлыкъларда шо гьакъда эсгере туруп, студентлени арасында мердешли кюйде оьтгерилеген ярышлагъа бизин уьлкеде алты йыл алдан берли де спортчулагъа ва къаравчулагъа тийишли онгайлыкълар болдурмакъ муратда гьазирлик юрюлюп тургъаны гьакъда айтды. Шону булан бирге ол оьтгерилген ярышларда алдынлыкъ алгъан спортчуланы да къутлады. Олар пагьму бажарывлугъу оьзлеге тенг гелеген спортчулар булан тогъатартып, гьар тюрлю даражадагъы медаллагъа ес болуп, оьр канзилеге гётерилмеге болгъаны гьакъда эсгерди. Спортчулар лап тизив гьасиллени гёрсетмеге болгъандан къайры да, оьзлени къылыгъыны, хасият битимини асиллигин, бир-биревге некъадар лайыкълы янашмагъа тюшегенин ташдырды.
Студентлени арасында спортну яйывгъа къарайгъан халкъара федерациясыны (FISU) ёлбашчысы Олег Матыцин де оьз гезигинде оьтгерилген универсиаданы ортакъчылары булан бирче гьайран тамаша гьислени сезгени гьакъда айтып сёйледи.
Оьтгерилген универсиаданы гьасиллерине гелгенде буса, спортчулар ес болгъан медалланы санавун гьисапгъа алгъанда, бизин уьлкени спортчулары 112, шоланы арасында 41 алтын медальгъа ес болуп, Россия биринчи ерге чыкъгъанын айрыча эсгермеге тюше. Экинчи ерге Къыбла Кореядан гелген спортчулар ес болгъан. Олар 14, шолардан да 6-сы алтын медаль къазангъан. Оьзлер алгъан медаллагъа гёре япониялы спортчулар – уьчюнчю ерде. Умуми кюйде алгъанда, 13, шолардан да 5 алтын медальгъа тюгюл ес болмай къалгъан.
Шу ерде универсиаданы къурумлу оьтгермек учун янгыз бизин уьлкени гьар тюрлю ерлеринден ва тыш пачалыкълардан гелген гьар тюрлю гьаракатланы яшавгъа чыгъарывгъа гёнгюллю кюйде къуршалагъанлар шайлы къошум этгенин де айтмай къоймагъа бажарылмай. Гезикли XXX Бютюндюнья къышлыкъ универсиада Швейцариядагъы Люцерна шагьарында 2021-нчи йылда оьтгерилежек деп къаравуллана.
