Украина бойдагъы хас асгер гьаракатны ортакъчысы Изамутдин Шапиевич Гьажиев 1984-нчю йылда Буйнакск шагьарда тувгъан. Бугюнлерде де ол къуллукъ этеген атышывчу бригада Запорожье областда асгер гьаракатны юрюте. Изамутдинни асгер касбусу  —  старший химик.

 

– Бизин бёлюк химия чапгъын болгъан юртланы ичине гирип, хас костюмлар да гийип, тарыкълы приборлар булан тергеп айланабыз, — деп хабарлай ол. – Шолай зараллангъан ерлер болса, тазалап ва дезинфекция этип, асгерлеге ва адамлагъа, юртлагъа, шагьарлагъа сонг гирме ихтияр бериле.

Ол оьзю де кёп дав агьвалатларда ортакъчылыкъ этген ва гёрсетген къоччакълыгъы учун Жуковну атындагъы медаль булан савгъатлангъан. Бугюнлерде ол авур яралангъанына да къарамайлы Магьачкъаладагъы госпитальда ята. Оьзюне зарал болгъан кюйню ол булай хабарлай:

– Запорожье областдагъы юртланы азат этгенде, онда яшайгъан­лар бизден сююнюп къаршылай эдилер, биз де олагъа сурсат, сув берип тургъанбыз. Оланы арасында да бар чы къаршылар. Шолай бир керен биз гирген юртдагъы ва биз кёмек этген къатын, телефондан таба, бизин батальон токътагъан ерни миллетчилеге билдирген. Сонг бизге багъып атышывлар башланды. Шонда мени де аягъыма авур яра тийди. Мени гьайымны этип айлангъан Пачалыкъ Думаны депутаты Ризван Къурбановну инамлы адамы Маржанат Гьасанова, Дагъыстанны Халкъ Жыйыныны председатели Завур Аскендеров, депутаты  Ильяс Мамаев къол ялгъагъангъа баракалламны билдирме сюемен. Озокъда, сав болгъандокъ, бригадама барып, оьзюмню борчумну кютювюмню давам этме де алгъасайман, – дей  Изамутдин.

Бугюнлерде ол Буйнакскидеги асгер бёлюкде къуллукъ этивюн узата.

 

Измулла ГЬАЖИЕВ.