• Судну залындан

 

20 миллион манат талап этген

 

Дагъыстанны Оьр судунда Магьачкъалада турагъан Мурат Аселдеровну уголовный ишине къаралгъан.

 

Судгъа бакъдырылгъан материаллагъа гёре, гетген йылны декабр ­айыны 31-нде М.Аселдеров ва ону бирдагъы беш ёлдашы шагьарны Аскерхановну атындагъы орамында ерлешген  офислени бирисинден  40 йыллыкъ далапчыны гючден чыгъарып, машини булан ювукъдагъы гаражгъа алып баргъан. Шонда ону токъаламагъа башлагъан ва оьзлеге 20 миллион манатны бермеге талап этген.

Янгы йылгъы байрамны алдында ёкъ болуп къалгъан адамыны гьакъында дос-къардашы къувун гётерип полициягъа билдирген. Тонавчуланы узакъ излемеге тюшмеген. М.Аселдеров далапчыны тезден берли таный болгъан. Уллу борчлагъа гирип, шолардан нечик къутулагъанны билмей, бузукъ ишлерин танышыны гьисабына тюзлеме къарагъан.

Суд М.Аселдеровну 5 йылгъа эркинликден магьрюм этмек деген къарарны чыгъаргъан. Ондан къайры, огъар 150 минг манат къодуну да тёлеме тюшежек.

***
Ахтарывлар узатылып тура

 

Август айны 31-нде Москва областны Одинцово районунда Дагъыстанны Халкъ Жыйыныны алдагъы депутаты Агьмат Гьамзаев оьлтюрюлген.

 

Ич ишлер министерликни маълумат бёлюгю билдиреген кюйде, шо гюн А. Гьамзаев тезги танышы, белгили продюсер Грант Палагаевлерде къонакълыкъда болгъан. Эргишилени арасында эришив неден башлангъаны гьалиге белгисиз. Тек ахырда Г. Палагаев янындагъы тапанча булан бир нече керен атышып, дагъыстанлыгъа оьлю яралар салгъан.

Продюсер тутулгъан, ахтарывлар узатылып тура. Агьмат Гьамзаевни бугюнлерде ата юрту Чумлиде (Гьайдакъ район) гёмгенлер.

***

Гьёкюнгенден не пайда?..

 

Бугюнлерде Буйнакск шагьар судда ерли гьакъыл­балыкъ болмагъан яшланы уголовный ишлерине къарала.

 

Судгъа ахтарывчулар бакъдыргъан маълуматлагъа гёре, янгы 16 йыл битген улан гетген йылны июн айыны 23-нде гюндюз вакъти  яшыртгъын, биревге де билдирмей,  атасыны машинин ягъып шагьаргъа чыкъгъан. Эмировну атындагъы орамда  сынаву ёкъ жагьил гьайдавчу «Ладасы» булан  ёлдан ­оьтюп барагъан 47 йыллыкъ адамны уруп йыкъгъан. Ол гечге таба эсге гелмей азарханада оьлген.

РФ-ни Уголовный кодексине гёре, суд жагьил адамны 12 йылгъа ерли эркинликден магьрюм этмеге бола.

Шо гюн судну алдында бирдагъы уьч яшгъа токътама тюшген. Олар да школаны оьр класларында охуй. Жагьил адамлар 2023-нчю йылны июн айыны 27-нде, гече сагьат эки битип, Б. Гьажиевни атындагъы орамда ерлешген уьйлени бирисини алдында токътагъан «Жигулини» эшик­лери ачылгъанын гёрюп, гьайдап къачгъан. Дёрт сагьат шагьарны  ичинден гезеп, танггъа таба машинни алдагъы ерине гелтирип салгъан.

Гьали гьёкюнгенден не пайда, машинни къайтарса да, законгъа гёре шо авур жинаятчылыкъгъа гьисаплана ва суд оланы 7 йылгъа ерли эркинликден магьрюм этмек деген къарарны чыгъармагъа бола.

***

Ойлашма зат бар!

 

Янгы охув йыл мекенли башланып, оьзюню бир адатлы, ёрукълу  кююне тюшюп битгенче де, школаларыбызны айланасында болуп турагъан агьвалатлар  бизин билим берив тармагъыбызда тарбиялав иш айрокъда акъсаймы экен деген ой тува. Мисаллар кёп бар, гьатта бирлерине байлавлу уголовный ишлер ачылды, такъсырлангъанлар да болду. Тек шоланы бирисинде де сентябр айны 4-нде Магьачкъаланы  11 номерли школасыны къырыйындагъы  «къалмагъалда» йимик шонча яшёрюм  ортакъчылыкъ этмеген эди.

 

Интернетде ерлешдирилген  видеороликде  15-16 йыл чагъындагъы школаны охувчулары (сонг Ич ишлер министерликни Магьачкъаладагъы Совет район бёлюгю аян этген маълуматлагъа гёре, оланы санаву 50-ден де артыкъ болгъан) бир-бирин аямай герти кюйде ябуша. Бир вакъти тапанчаны атышыву чалынма башлай. Яхшы чы, шону 15 йыллыкъ есиси оьрге багъып атыша. Шогъар шагьат болгъан уллулар яшланы айырагъанны орнунда, токъалашывну ариден туруп кисе телефонларына чыгъара. Ювукъ болуп гелеген полиция машинлени къувунлу сесин эшитгенде,  яшлар тез  яйыла.

Ич ишлер министерликни прес-къуллугъу  билдиреген кюйде, ябушувда ортакъчылыкъ этгенлени атлары токъташдырылгъан, олар ата-аналары булан бирче полиция бёлюкге чакъырылгъан. Ахтарывлар узатылып тура.

Аманлыкъны къоруй­гъан къурумлар ябушув не себепден башлангъанын да токъташдыргъан. Охувчу яшланы бирисини къызардашы Интернетде бир улан булан байлавлукъ юрюте болгъан. Шо эркъардашыны кепине гелмеген ва жагьил адамны «бетге-бет»  сёйлеме чакъыргъан. Тек гьали совет заманлар тюгюл, бирев де бирге-бир ябушма чыкъмай. Бу гезик де эки де якъ гьариси оьзлер булан 20-дан артыкъ  къурдашын, танышын  алып гелген болгъан.

Роликге байлавлу сесленивлени арасында бириси тергевюмню тартды. «Мен охуйгъан заманда школабызда низам болдурмакъ учун класланы тазалайгъан Патимат баживню бир къараву да таманлыкъ эте эди. Гьали эшик алларында токътагъан къаравулчулар, яшларын школагъа машинлери булан алып да гелеген, алып да гетеген ата-аналар…Тек неге буса да алдагъы тарбияны эс этмеймен. Бу адамлагъа не болуп тура?» – деп талчыгъып яза Интернетни къоллавчусу Вагида.

Гертиден де, ойлашма зат бар!