Юзюмчюлюк Къаягент районда гьар заманда да аслу тармакъ болуп гелген. Къаягентлилени уьстюнлюклери республикада яхшы белгили. Бу йылны да оьзге йыллардан башгъалыгъы ёкъ. Сентябрни 2-синде районну юрт хозяйство предприятиелери, фермер ва оьзенчили хозяйстволарыны есилери юзюм къайтарыв кампаниягъа гиришди.
Райондагъы 3169 гектар тюшюм береген бавланы 1458 гектарындагъы татли емиш эки жуманы ичинде жыйылгъан. Орта гьисапда гьар гектардан 94,2 центнер юзюм гесилген. Райондагъы юзюм бавланы аслам пайы – 2276 гектары − ГУП-ланы ва СПК-лени еслигинде.
Районну юрт хозяйство бёлюгю береген маълуматлагъа гёре – сентябрни 18-ине «Кировский», «Каспий», «Къаягент» пачалыкъ унитар предприятиелер ва «Янгывикъри» деген СПК – юзюм къайтарывну алдынлылары.
Алдагъы гюнлерде биз районда ва республикада белгили «Къаягент» ГУП-ну бригадири Сепият Жабрайылованы бригадасында болдукъ. Бригадагъа бегетилген 140 гектар бавлар барысы да тюшюм бере. Юзюм къайтарыв – жаваплы кампания. Сав йылны узагъында бавланы ичинде оьтгерилген ишлеге къыймат берилеген вакъти.
– Бизге бу йыл уялма тюшмежегине шекленмеймен, – дей бизин булангъы лакъырында бригаданы ёлбашчысы Сепият Жабрайылова. – Сав йылны боюнда бавларда тер тёкген 25 ишчибиз юзюм чёплевде ортакъчылыкъ эте. Гюнде 20-25 тон татли емиш гесиле ва «Къаягент» ГУП-ну чагъыр заводуна етишдириле.
Ягъадан къарап Сепиятгъа ва ону булан загьмат тёгеген къатынгишилени ишлерине тамаша боласан, булагъа гюч къайдан геле экен деп ойлашасан. Бригаданы гьар ишчиси гюнде орта гьисапда 800-1000 кило емиш чёплей. Гюлбарият Махаеваны, Патима Магьамматованы атларын айрыча эсгеребиз. Бай тюшюм оьсдюрювде бавланы къаравулчусу, сугъарывчусу Къурбан Сайитовну, Сепиятны кёмекчиси, бавлагъа себилеген дарманланы гьазирлевчю ва ишчи къатын Равгьаният Къурбанованы да аслам пайы бар.
– 5 йыл алда биз бавланы алгъанда, мунда гьар гектардан орта гьисапда 10 центнер тюгюл юзюм къайтарылмай эди, – дей, лакъырны узата туруп, Сепият. – Гьали къарагъыз, бавланы гьар гектарындан бу йыл орта гьисапда 100 центнерге ювукъ юзюм жыймагъа къастыбыз бар.
Гертиден де, юзюм бавлагъа къарап, оланы тазалыгъын, оьсдюрюлген емишни гёрген сонг, Сепиятны сёзлерине инанмай болмайсан. Сепият – сёзюню еси. Ону айтгъаны да, этген иши де бир. Шо хасиятлары учун Сепият Жабрайыловагъа ишчилер де, хозяйствону ёлбашчылары да сый ва гьюрмет этелер. Ону аты бугюн савлай республикагъа белгили. Юзюмчюлюк тармакъда етишген уьстюнлюклери учун ол бир нече керенлер белгиленген.
Биз де гьаракатчы бригаданы сынавлу ишчилерине савлукъ, иш уьстде янгы уьстюнлюклер ёрайбыз, дагъы да оьрлюклеге гётерилежегине шекленмейбиз.
Суратда: бригадир
Сепият Жабрайылова.
