Артдагъы эки йылгъа ювукъ вакътини ичинде бизин уьлкеде иш гёреген «Алдынлыланы гьаракаты» деген яшланы ва  яшёрюмлени къуршайгъан къурум Россияны Президенти  Владимир Путинни сиптечилиги булан къурулгъан.

Эсгерилген къурумну Къарабудагъгент райондагъы бёлюгю яшлагъа ва яшёрюмлеге пайдалы болардай не йимик ишлени этип турагъаны гьакъда бизин газетни бёлюгюню редактору шо муниципал къурулувунда жаваплы касбучуланы бириси Осман  РАЖАПОВ булан ёлугъуп, лакъырлашыв юрютген.

 

– Осман, «Алдынлыланы гьаракаты» деген бютюнроссия къуруму оьзю­ню алдына борч этип не йимик масъалаланы сала?  

– 2022 — нчи йылны июль  айындан тутуп иш гёреген «Алдынлыланы гьаракаты» деген бизин къурум  бир  башлап яшланы ва яшёрюмлени гьар тюрлю тармакъларда алынгъан билимлерин камиллешдирмекни гёз алгъа тута. Торайып гелеген яш наслуну вакиллерини ял алывун болдурувдан къайры да, оланы бизин халкъланы асруланы боюнда амалгъа гелген чинк де асил адатларына, ругь-къылыкъ мердешлерине асасланып тарбиялавгъа да тергев бериле. Демек, яшлар ва ­оьрюм чагъындагъылар гележекде тувуп оьсген элине, халкъына, савлай жамиятгъа пайдалы болар йимик яшав къаравларына таъсир этип, оланы англавларын артдырмакъны къастын болдура.

«Алдынлыланы гьаракаты» деген къурум уьлкени ёлбашчысыны сиптечилиги булан къурулгъан сонг, ону болушлукъ этивю булан да иш гёре. Ачыкълашдырып айтгъанда, бютюнроссия оьлчевюнде къурумну тер­гев советине де ол оьзю ёлбашчылыкъ эте. Гьар регионну башчысы ва муниципал къурулувуну гьакимбашы да къурумну ишине шолай къуршала. Бизин муниципал къурулувунда да районну гьакимбашы Магьмут Гьюсейнович Амиралиев къурумну ерли бёлюгюню ёрукълашдырыв советине ёлбашчылыкъ эте.

– Къарабудагъгент районда шо къурумну ерли бёлюгю къурулгъаны кёп боламы? Шону ишин юрютеген сен янгыз тюгюлсендир?

– Гертилей де, «Алдынлыланы гьаракаты» деген къурумну ерли бёлюгю бизде къурулгъанлы арадан бир нече ай тюгюл оьтмеген. Менден къайры да, ерли бёлюкню ишине Райсанат Унаева ва Лайла Исрапилова къуршалгъан. Олар да  – яшлар ва яшёрюмлер булан иш юрютюв тармакъда бай сынав топ­лагъан бажарывлу касбучулар. Айтагъаным, билим берив район управлениеде ва яшёрюмлени ишлерине къарайгъан бёлюгюнде узакъ йылланы боюнда ишлей туруп, олар экиси де шо тармакъда юрюлеген иш не ёрукъда кютюлмеге тюшегенине мекенли кюйде тюшюнген. Мен оьзюм де, сен де  билеген кюйде, муаллим де дюрмен, билим берив район управлениесини баш касбучусу гьисапда чалышагъаным да кёп йыллар бола. Шо саялы бизин къурумну ишине байлавлу гьар гюн де тувулунагъан къурумчулукъ ва оьзге  тюрлю масъалаланы чечмеге, тюзю, онча къы­йын да болмай. Озокъда,  бизин районда иш гёреген охув ожакъларда билим алагъан охувчулар булан арасы бёлюнмейген кюйде иш юрютмеге тюше.

– Демек, мен англагъан кюйде, къурумну ортакъчылары гьисапда охув ожакъларда  билим ала­гъан яшлар къабул этиле дагъы?

– Озокъда,  буссагьатгъы вакътиде бизин районну юртларында иш гёреген охув ожакъларда ва къошум билим берив идараларда къурумну ерли  бёлюклерин къурувгъа артыкъ агьамият бериле. Шолай, бизин къурумну ерли бёлюгю къурулуп иш башлагъан бу йылны июль айындан бугюнлеге ерли Къарабудагъгент районну юртларындагъы 27 школада «Алдынлыланы гьаракаты» деген къурумну башлапгъы бёлюклери ачылып иш юрюте. Булай алгъанда буса, 6 йыллыкъ чагъындан тутуп 18 йыл  битгинчеге гьар ким де бизин къурумну ишине гёнгюллю кюйде къошулмагъа бола. Насигьатчылар гьисапда яшланы ата-анасы да къуршалма бажарыла. Арадан заман оьтюп буса да, орта оьмюр чагъын­дагъы ва эсли наслуну вакиллерини арасындан бизин къурумгъа къошулагъанлар болажагъына мен де инанма  сюемен.

– Осман, юртларда башлапгъы бёлюклери къурулгъан сонг, яшлар ва яшёрюмлер булан бир тюрлю ишлер юрюлмей де тюгюлдюр?

– Бизин къурум янгыз уьлкени ва республиканы оьлчевюнде белгиленеген   агьамиятлы тархлагъа артыкъ агьамият берип къоймай. Торайып гелеген яш наслуну вакиллерине насигьатлы сёзюн айтып етишдирмеге болагъан гьар тюрлю тармакъларда гёрмекли оьрлюклеге етишген касбуланы есилери, атын айтса, эл таныйгъан оьзге белгили адамларыбыз булан ёлугъувлар оьтгермекни къасты да этиле. Бизин яныбыздан яшланы ва яшёрюмлени тувуп оьсген ата юртуну ва элини тарихине, спортну гьар тюрлю журалары булан машгъул болувгъа, чинкдеси, оьзлени савлугъуна гьайлы янашып, санлы оьмюр сюрювге иштагь-ландырардай гьаракатлагъа къур­шамакъны гьайы этиле.

– Шу ерде оьтгерилген бир-бир чараланы айтсанг, да ярай…

– Айтайым… Россияны, Дагъыстанны Конститу­циясыны гюнлерин белгилейгенде, олай да бизин республикада артдагъы йылларда белгиленеген  Дагъыстанны халкъларыны бирлигини гюнюне байлавлу бизин сипте-чилигибиз булан оьтген гьаракатлар маъналы болду деп айтмагъа ярай

Янгы охув йылны башында бизин сиптечилигибиз булан къурумгъа янгы ортакъчыланы къабул этивге, сонггъа таба  Муаллимлени гюнюне, гьар тюрлю тархлагъа багъышлангъан кёп санавдагъы чараланы гьакъында эсгере турмасам да, футбол оюндан  тренировкаларда, биринчи медицина кёмек болдурувгъа байлавлу гьаракатларда  яшлар жагьлы кюйде ортакъчылыкъ этди. Яй айларда бизин къурумну ерли бёлюгю Къарабудагъгент районну денгиз боюнда ерлешген лагерлерде ял алагъан яшлар булан муратгъа къыйышывлу иш юрютюп турду. Шу оьрде мен айтып гетген бары да гьаракатланы арасында, озокъда, «Каспий-2023» деген форумда  ортакъчылыкъ этивю яшланы лап да бек эсинде къалгъан агьвалатланы бириси болуп токътады. Мен ойлашагъан кюйде, олагъа шо форумну вакътисинде башгъа ерлерден гелген оьзлени тенглилери булан къатнамагъа шартлар яратылгъандан къайры да, савлай уьлкеде айтылгъан белгили адамлар булан ёлукъмагъа да имканлыкъ берилди. Дагъыстанны Башчысы Сергей Алимович Меликов булан ёлу­гъуп, лакъырлашмагъа, ону булан бирче сурат алдырмагъа болгъаны да, шексиз кюйде, яшлагъа айрыча таъсир этди. Озокъда, бизин къурумну ерли бёлюгю булан яшавгъа чыгъармагъа гёз алгъа тутулгъан дагъы да гьаракатлар бар. Шоланы гьакъында алданокъ айтмайлы къояйым. Гележекде  бизин анадаш «Ёлдаш» газет дагъы да имканлыкъ берсе, шолар  кютюлген сонг айтарман

–  Яхшы. Барыбызда билеген кюйде, биз нечакъы сюймесек де, яшлар, олай да яшёрюмлер буссагьатгъы вакътиде интернетде иш гёреген жамият торларында оьзлени кёп заманын йибере. «Алдынлыланы гьаракаты» деген къурумуну янындан шоларда торайып гелеген наслуну арасында иш юрютювге не къадар агьамият бериле? 

– Шону биз де англамай тюгюлбюз. Шо саялы бизин къурумну юрютеген ишини гьакъындагъы маълуматлар Телеграмм, ВКонтакте ва Одноклассники деген  яшавлукъ торларындагъы хас  сагьифаларыбызда оьз­леге ер таба. Шо гьакъда  айта туруп, бизин гьар гюнлюк ишибизге республика бёлюгюне къуршалгъанлар да къурумчулукъ  якъдан, гёрсетивлер берип де кёмек этегенин эс­гермеге тюше. Сонг да охув ожакъланы ёлбашчыларыны заместителлери, насигьатчылары, олай да вожатыйлар биз юрютеген гьаракатгъа ортакъчы болуп  туралар. Шолайлыкъда, ортакъ къастыбызда яшланы гележеги гёз алгъа тутула.

– Англашыла.  Мен де сизге барыгъызгъа да шо къастда  уьстюнлюклер ёрайман. Лакъырлашыв учун да баракалла.

– Сен де  савбол.

 

Лакъырлашывну язгъан Насрулла БАЙБОЛАТОВ.