Инг алда У. Омарова эсгергени йимик, адамны ихтиярларын якълавгъа къарайгъан толу ихтиярлы вакилини аппараты йылны боюнда орта гьисапда ватандашлардан бир минг ярымгъа ювукъ арза къабул эте. Ватандашлар аслу гьалда оьзлени яшавлукъ талаплары тийишли даражада кютюлмейгени, бир-бир кемчиликлеге ва оьзлени ихтиярларын къыйыкъсытывлагъа ёл берилегени гьакъда билдире. Оьзлени талапларын кютювде тюзлюкню ахтарагъанлар кёбюсю гьалда адвокатланы къуллукъларына гьакъ тёлеп болмайгъан кёп яшлы агьлюлер, сакъатлар, савутлу агьвалатланы ортакъчылары, олай да яшав даражасы лап тёбен даражадагъы ватандашланы гьар тюрлю къатлавларыны вакиллери гьисаплана.
– Гетген йыл биз ватандашлардан 993 арза къабул этдик. Шоланы аслам пайында кютюлген яшавлукъ къуллукълагъа гьакъ тёлевде йиберилеген кемчиликлер гьакъда айтыла. Булай да, кютюлген коммунал къуллукълагъа гьакъ тёлевде тувулунгъан гьал биревге де яшыртгъын тюгюл. Адамлар оьзлеге шо тармакъда салынгъан борчланы башын-бавун табып болмай кёп инжинелер. Озокъда, гьар ким де янгыз къоллагъан электрик ярыкъгъа, табии газгъа тийишли гьагъын тёлемеге тарыкъ. Бизге буса шо тармакъда йиберилеген къыйыкъсытывланы кёбюсю гьалда прокуратура булан бирликде алдын алмагъа тюше, – деди У. Омарова.
– Тек бизге ватандашлар язгъан арзаланы гёзден гечирегенде, гьар гезигинде оланы ихтиярлары къыйыкъсытыла деп айтмагъа бажарылмай. Нечик де, ватандашлар бир-бир гезиклерде министерликлер ва ведомстволар оьзлени арзаларына байлавлу къабул этген къарар, не де яшавгъа чыгъарагъан гьакъыкъатгъа къыйышагъан кюйдеги дурус чаралар булан разилешмей къала.
Ватандашланы бизге тюшеген арзаларыны бир пайын оьзюбюз ахтарабыз, шоланы къалгъан пайын гьакимлик къурумларына бакъдырабыз. Неге тюгюл, биз оьзюбюз бары да масъалала-
ны чечмеге болмайбыз. Шондан къайры да, биз судланы къарарларына байлавлу арзаланы да къабул этмейбиз. Нечик де, судну къарарын башгъа бир къурум гери урмагъа болмай. Судларда оьзлени яда ювукъ адамларыны ихтиярлары къыйыкъсытылагъаны гьакъда арз эте туруп гелгенлеге биз тюзлюкню токъташдырмакъ учун не ёрукъда иш гёрмеге тюшегени гьакъда англатыв беребиз, – деп эсгерди ол дагъы да.
Дагъыстанда адамны ихтиярларын якълавгъа къарайгъан толу ихтиярлы вакили Уммупазиль Омарованы пикрусуна гёре, ватандашлар оьзлени ихтиярларын толу кюйде билмейгени саялы да къыйыкъсытывгъа ёл бериле. Шону булан бирге гьакимлик къурумларыны бир-бир жаваплы къуллукъчулары ватандашланы талапларын кютювге немкъорай янашып къала.
Насрулла БАЙБОЛАТОВ.
