Яша, нартым!
Яша, нартым!
Бир керен бай къулуна: «Дюньяда не зат багьа экен?» –деп сорай. «Озокъда, савлукъ», – деп ташдырып жавап берген ол. Гертиден де, савлукъдан артыкъ, шондан багьалы дагъы не зат бар?
Мен бу макъаламда савлукъ сакълав тармакъгъа тувра аралыгъы бар Хасавюрт район больницаны урология бёлюгюнде ишлейген ДР-ни ат къазангъан врачы Давут Ханакъаевни гьакъында хабарлама сюемен.
Ол Дагъыстанны халкъ шаири Анвар Гьажиевни ата юрту Кёстекде тувгъан, шонда яланаякъ яш йыллары оьтген. Ерли школаны битдирип, Хасавюртда 1960-нчы йылны башында ачылгъан медучилищени тамамлай. Къолуна диплом да алып, загьмат ёлун фельдшер гьисапда башлай. Озокъда, юрюмеген сюрюнмес дегенлей, башлапгъы абатлар кимге де тынч болмай.
Арадан йыл оьтюп, аз-кёп буса да сынав топлап мединститутда охувун камиллешдирме насип иржая. Иш канзилени оьрюне оьрленме къаст эте, бара-бара мурадына да ете.
1982-нчи йыл Хасавюрт район больницада урология бёлюк ачыла ва шогъар ёлбашчылыкъ этме белсенип, къол чююрюп, сынавун къоллап, аврувланы арасында абурсый къазанма, баракалласын алма эринмей-талмай чалыша.
Давут Ханакъаевни яшлыгъы, къысматы оьзгелеге ошамай. Кёп яшлайын, сабий чагъындан тутуп, атаны ярыкъ юзюнден тойма гьасирет къалып оьсе. Анасы кютеген авур ишлеге оьз къошумун эте, инисин къанат тюбюнде оьсдюре. Яшавлукъ шартлагъа гёре, Хасавюртгъа гёчюп яшай. Анасыны къызардашы гьар тюрлю яндан оьз къошумун болдура, яшавну тюз ёлуна салма къаст эте. Гьаракаты пуч гетмей, юрегине тутгъан мурады уланкъардашыны авлетлери яшавда насипли ожакъ-уьй къуруп, тюз ёлгъа тюше.
– Магъа Давут Ханакъаев булан бирче охума насип болду, – дей ДР-ни ат къазангъан врач-стоматологу Изитдин Атаев. – Ол ишин билегенден къайры да, эл арада болгъур деген таза юрекли, чомарт къоллу, кимни юрегине де ёл табып, илиякълы янашыву булан макътавгъа лайыкълы десем къопдурув болмас.
Бугюнлерде айтылгъан бёлюкге башчылыкъ этеген яш улан Марат Шапиев, сеслене туруп: «Мени насигьатчым, гьали де онг къолум Давут Ханакъаевни алдында кёп затгъа борчлу къаламан, огъар бакъгъан гьюрметим бир де сёнмес, даим огъар баш иемен, савлукъ сакълав шагьра ёлуну сигьручу малайиги десем, ялгъан болмас».
Сёзюмню шу тюпде берилген сатырларым да исбатлай.
Эм излегенге
Ер юзюнде
Атынг сес бере
Къумукътюзюнде.
Юрек, ишле,
Юрек, талпын,
Сенден рагьму
Алсын халкъым.
Давут бизде –
Айтылгъан докътур,
Булакъдай рагьму
Огъар тенг ёкъдур.
Ата юртунда
Айтылгъан улан,
Гече-гюн Давут
Аврувлар булан.
Яша, нартым,
Даим сююне,
Давут оьзю де,
Тюз сёзю де.
Зайналабит БАСХАНОВ.
Хасавюрт район, Ботаюрт.