Ярым килолукъ дёрт нарыста...
Ярым килолукъ дёрт нарыста...
Артдагъы йылланы ичинде, коронавирус бизде яйылгъанлы, гьисап беривлеге гёре, тувагъан яшланы санаву да кемиген. Шогъар гьар тюрлю себеплер де бар. Мисал учун, шо мезгилде агьлю къурмакъ учун къошулагъанлар да аз болгъан, айрылагъанлар да артгъан. Ондан къайры да, тувагъан яшланы арасында да савлугъуна байлавлу бир-бир тетиклери булангъылар да аз тюгюл.
Январ айда А.В. Вишневскийни атындагъы республика клиника больницаны яшлар табагъан бёлюгюнде 500 грамдан биразгъа къолай авурлугъу булан бир улан ва уьч къыз тувгъан. Шоссагьат оланы янгы тувгъанланы реанимация ва интенсивный терапия бёлюгюне салгъанлар. Врачлар оланы уьстюнден таймай, тийишли медицина кёмек этип туралар. Олар буссагьатгъы вакътиде болжалындан алда тувгъанланы салагъан хас аппаратланы ичинде тура. Шонда сабийлени эсен-аман оьсдюрмек учун тийишли иссиликни де, гьаваны низамын да, герекли даражада бавукълукъну да сакълай. Шолай шартлар да гиччипавлар анасыны къурсагъында йимик гьис этип оьссюн учун яратыла.
Бугюнлерде шо тюйме чакъы гиччипавлар къолайлыкъгъа бара, оланы яшавуна къоркъунчлукъ ёкъ. Нарысталагъа толу кюйде биринчи кёмекни этип битгенде, энниден сонг да савлугъун бакъмакъ учун оланы Н. М. Кураевни атындагъы яшланы республика больницасына чыгъаражакълар.
– Бизин касбучуларыбызны къаркъарасыны авурлугъу кёбокъда аз тартагъан яшлагъа къарамагъа болагъан кюйде яхшы сынаву бар,–деп англата А. В. Вишневскийни атындагъы яшлар табагъан республика больницаны реанимация ва интенсивный терапия бёлюкню врач-ординатору Анастасия Ягьияева. – Оланы оьр касбу даражасыны больницада болдурулгъан шартланы, хас ясандырывланы, аппаратланы, дарманланы яхшылыгъындан бизин бёлюкде 2020-нчы йыл 2,5 процентден 2022-нчи йылда 1,5 процентге ерли тувуп, 28 гюнню ичинде оьлеген нарысталаны санавун кемитмеге болдукъ,–деди ол.
Анастасия Ягьияева билдирген кюйде, гележекде ана болмагъа онгарылагъан жагьил къатынлагъа янгыз врачланы касбу даражасына умут этмеге тюшмей.
– Яшгъа авур болгъанча 3 ай, дагъы да яхшы ярым йыл алда эр-къатын бирче медицина тергевлерден оьтюп, не аврувлары барны токъташдырып, шоланы багъып, ёрукъгъа гелтирип гьазирленмеге тарыкъ. Шо адилли ёлну тутса, нарыстагъа толу савлугъу булан оьсмеге пуршав этеген хыйлы кемчиликлени алдын алмагъа болажакъ. Чакъсыз тувгъан яшланы савлугъуна байлавлу кёп масъалалар арагъа чыгъа. Эгер де врачланы талапларын, насигьатларын жагьиллер гьакъыллы кюйде кютсе, къатты савлугъу булангъы нарысталар туважакъгъа шекленмейбиз. Шону булан бирге бизин юреклерибизни рагьатсызландырагъан гьисап беривлер де яхшы янгъа алышынажакъ эди.
2022-нчи йыл Республика клиника больницада болжалына етишмей 214 яш тувду, оланы арасындан 29 сабийни къаркъарасыны авурлугъу кёбокъда тёбен эди,–деп билдирди Анастасия Ягьияева.