2023-нчю йыл тамамланып, Янгы йылны алдындабыз. Оьтюп барагъан йылгъа къарасакъ, алдындагъы йыллардан эсе артыкъ иш этилгени гёрюне. Шолардан аслуларын айтсакъ. янгыртылгъан яшлар бавлары ачылгъаны булан бирге, билим берив ожакълагъа тергев артгъаны, адамлагъа рагьатланмакъ учун Уьчгент ва Алмалы юртларда ерлер этилгени де сююндюре. Озокъда, чечилип битмей турагъан масъалаларыбыз да бар.

Бизин районгъа ишчи сапары булан гелген Дагъыстанны Башчысы Сергей Меликов шону оьзю де гёрдю. Бир пайын тез заманны ичинде чечме сёз де берди.

Аслу ишлени эсгерсем, районда табиатгъа ва адамлагъа заралы тиймейген ювукъ арадагъы муниципал къурулувланы насларын ишлетеген завод къурулагъанын айтма боламан. Шонда янгы иш ерлер ачылажакъ ва аслу гьалда районну халкъы ишлежек.

Бизин райондан Украина бойда юрюлеген хас асгер гьаракатда кёп адам ортакъчылыкъ эте. Дав майданда жанын къурбан этгенлени атларын даимлешдирмек учун чаралар оьтгеребиз, агьлюлерин тергевсюз къоймайбыз.

Бары да ишлеге яшёрюмлени къуршайбыз, шо да тарбиялавну бир гесеги болуп токътай. Гьали-гьалилерде ачылгъан «Эсделик бавда» тереклер орнатагъанда да кёп яшны къуршадыкъ.

Бизин районда гьар йыл «Энемжая» деген республика оьлчевдеги яшланы милли байрамы оьтгериле. Спортчуларыбызны айтсакъ, олар гёрмекли ярышларда ортакъчылыкъ эте ва савгьатлы ерлени ала. Гележек йылларда спорт комплексни масъаласы чечилсе, спортгъа къуршалагъанланы санаву  артажакъгъа шеклик этмеймен.

Бизин райондагъы «Сарихум» деген яшланы бийив ансамбли савлай дюньягъа белгили деме ярай. Имканлыкълар яратылса, ишлерибиз дагъы да къурумлу юрюлежек.

Гелеген йылгъа да уллу умутлар бар, Тёбе ва Къоркъмаскъала юртларда билим берив ожакълар къурулма башланажакъ, башгъа юртларда да ёллар янгыртылажакъ. Тарыкълы кагъызлар тийишли ерлеге етишдирилген. Янгы йылда юрт хозяйство масъалаларыбыз да чечилер деп умут этебиз.

Бизин умутларыбыз йимик, гелеген йыл бары да халкъны ойлары да яшавгъа чыкъсын, ингдеси, ер юзюнде парахатлыкъ болсун!