Авлакъчылар учун кёпден къаравуллангъан оьсдюрюлген ашлыкъланы къайтарывну лап да къыставуллу гюнлери гелип тура. Буйнакск районну ашлыкъ оьсдюрювчюлери заманны багьалы мюгьлетлерин гёзалгъа тутуп гюзлюклени тюшюмюн болгъан чакъы тас этивсюз къайтарма гиришгенлер. Ювукъ гюнлени ичинде бишип турагъан будайны, арпаны ва ныханы тюшюмлерин чалтлыкъда оруп, алданокъ гьазир этилген гётермелеге тёшемесе, загьматчыланы къыйыныны бир пайы тас этилип, заралланмакъ бар.
Бугюнлерде районну юрт хозяйство управлениесини начальнигини борчларын заманлыкъгъа кютеген Зайналбек Таштемиров ашлыкъ къайтарывну барышы булан ювукъдан таныш болгъан. Тёбен Жюнгютей юртдагъы авлакъланы ижарагъа алып ашлыкъ оьсдюреген Багьавутдин Мугьитдинов «Сынлы тёбе» деген авлакъда къонакъланы къаршылай туруп, гетген йыл бу бойну гьар гектарында 32,5 центнер будай оьсдюрме болгъанын, бу йылгъы тюшюм аз болма имканлы экенин айтды. Шолайлыкъны себебин де ол апрель ва май айларда явунлар аз болгъанлыкъдан гёре. Багьавутдинни тилевюне гёре «Акрас-550» комбайынын ишлетеген касбучу ярыкъ тангдан гече геч болгъанча загьмат тёге. Дагъы ёгъесе, тийишли къуллукълары да кютюлюп, оьсдюрюлген ашлыкъланы бюртюгю яйны яллавуна чыдамай тёгюлюп тас этилмеге бола.
Чакъ язбашдан тутуп да оьзге йыллардан эсе явунсуз, къургъакъ ва ва исси болмакъгъа гёре бу йыл оьсдюрюлген ашлыкъланы тюшюмю кемимек бар. Шогъар да къарамайлы, яйны бир гюню сав йыл ашатар дегенлей ашлыкъ осдюрювчюлер болдурулгъан берекетни тас этивлерсиз къайтарып, беженлеге топлама гьаракат этелер.
Казим КЪАГЬРУМАН.
СУРАТДА: З.Таштемиров (ортада) ашлыкъ оьсрюрюв
чюлер булан.
