Атеросклероз деген авруву барланы къантамурлары тар болуп, къан тийишли кюйде айланып болмай. Натижада къантамурлар тыгъылып, юрекге яда башмайгъа къан яйылма бола. Атеросклероз аврув аз тербенеген, семиз, ичеген ва сигарет тартагъан адамлагъа кёп къабуна. Гьава нас, сонг да адамланы таза гьавагъа чыгъып къыдырма чоласы ёкъ. Ашамлыкъны сан яны осал, яшавда къайнашма тюшеген гезиклер кёп болагъаны да юрекге яман таъсир эте. Шогъар кёмек этме болагъан дарманны таклиф этебиз. Дарманланы аслу яны ябушгъанны чечеги ва емишлеринден гьазирлене.
4 ашкъашыкъ ябушгъанны чечегине 200 мл. спирт тёгюп, 3 жума башын ябып къоя. Сонг сюзюп, шону ашдан алда 1 чайкъашыкъны иче. Ону сув къошуп ичсе яхшы.
1 стакан янгы жыйылгъан ябушгъанны агъачкъашыкъ булан янчып, уьстюне 200 мл. спирт тёгюп 3 жума къоя. Сонг шону сюзюп алып, ашны алдында гьар гезик сув булан 1 чайкъашыкъны ичигиз.
Ябушгъанны емишинден 20 гр. алып (къуругъаны да ярай), уьстюне бир стакан къайнайгъан сув да тёгюп, аста яллайгъан отда 5 минут къайната. Гьар ашыгъызны алдында, юхлама ятгъанча 200 мл. шону сувун ичме тюше.
1 стакан ябушгъанны емишине 500 мл. къайнагъан сув тёгюп, 2 ашкъашыкъ шекер де къошуп, юваш яллайгъан отда ярты бишгенче къайната. Сонг сюзмей, емиши, суву булан холодильникде сакълай. Ашагъанча 1 ашкъашыкъны, гече ятгъанча 2 ашкъашыкъны къоллама герек.
Уьстде эсгерилген дарманлар къара ябушгъандан этиле. Гьали ону къызыл тюслюсю гьакъда айтайыкъ.
Ону емишлери де савлукъ учун бек пайдалы. Бир стакан емишни агъачкъашыкъ булан янчып, 100 мл. сув тёгюп, 40 градус иссилик болгъанча исите. Сонг яхшы кюйде сыгъып, гюнде уьч керен ашны алдында 1 ашкъашыкъны къоллай. Бу этме тынч дарман юрекни жымчыкъэтлерин къарт болма къоймай.
Паху ГЬАЙБУЛЛАЕВА.
