Капиркъумукъ юртда тувгъан, оьсген, юрт школада охуп билимлер алгъан агъа-ини Вали ва Али Телекъаевлер онлар булангъы оьзлени тенглилери йимик къысматларын асгерде къуллукъ этив булан тыгъыс кюйде байлагъан. Олар ана Ватанны гьакъ герти якълавчулары болуп, танглагъан ёлуна берилип, оьзлени лап яхшы янындан гёрсетип чалышалар.
Бу уланлар гиччиденокъ юрт хозяйство машинлер ва оьзге тюрлю техника булан ювукъдан таныш бола, долана, оланы бар-ёкъ бузукъ ерлерин аян эте, ярашдырма амыракъ болуп оьселер. Техникагъа шолай гьасирет болмакълыкъны пайдасы олагъа гележекдеги яшавунда кёп керенлер тийген.
Уллусу Вали Телекъаев юрт школаны тамамлап 2016-нчы йыл декабрни 4-нде асгер къуллукъгъа чакъырылгъан. 2017-нчи йылны май айыны 12-синден тутуп дыгъар байлап, касбусун асгерде къуллукъ этивге багъышлагъан. Ол Сирия республикада болуп да, Украина бойларда миллетчилеге къаршы туруп да командирлени тапшурувларын тайышывсуз кюйде кютюп юрюй. Асгер къуллугъун намуслу кютегени учун медаллар булан да савгъатлангъан.
Бу гезик мени хабарым – Магьамматзапир ва Мадина Телекъаевлени экинчи уланы Алини гьакъында. Украинада юрюлюп турагъан дав агьвалатларда яраланып, госпиталларда ятып къолайгъа къайтгъанда отпускагъа гелген Али булан ёлугъуп къысгъаракъ лакъыр этме магъа мюгьлет табылды.
Ол 1996-нчы йылны май айны 4-нде тувгъан, юрт школада охуп 9 классны битдирген сонг Магьачкъаладагъы 10 номерли школада охувун давам этген. Автодорожный техникумгъа тюшюп ону да тамамлагъан сонг, ол 2016-нчы йыл асгерде къуллукъ этме чакъырыла. Игит шагьар Волгоградда асгер бёлюгюнде къуллукъ эте. Арадан уьч ай гетип турагъанда оьзю кёп сююп дыгъар байлай ва наводчик-оператор, БМП-ни командирини заместители гьисапда Владикавказ шагьаргъа йибериле. 2018-нчи йыл Алини Буйнакск шагьардагъы асгер бёлюкге чыгъаралар. 2022-нчи йылны феврал айында ол Кърымдагъы Джанкой шагьаргъа бакъдырыла. Февралны 24-нде буланы асгер бёлюгюне Украинаны Мариуполь шагьары учунгъу дав гьаракатда ортакъчылыкъ этме буйрукъ бериле.
Старший сержант, атышыв савутну командири Али Телекъаев асгер ёлдашлары булан бирге бизин разведка берген маълуматлагъа гёре атышыв юрютюп душманны кёп уллу агьамияты булангъы объектин дагъытма бажаралар. Гьавада учуп айланагъан душманны дронлары буланы токътагъан ерин аян этип дагъытма урунмасын учун, гьалны алышдырмакъны къастында тербенелер. Бираз ариде ёлну бою булан тамаша чайкъала барагъан адамны эс этген Али, огъар ювукъ болуп, ишни гьакъыкъатын сорай. Ол да ювукъдагъы агъач бёлекде, яралангъан етти асгерчи ажиз болуп турагъанын билдире. Али о гьакъда командирине де айтып, тезликде яралыланы къутгъармакъны гьайын этелер.
Ондан сонг Али Телекъаев Запорож областны Старомалиновка юрту учунгъу гьаракатда ортакъчылыкъ этме борчлу бола. Бир гюн эртен сагьат 5-ден 7-ти болгъунча душман къамалгъан бёлюклеге токътамай атышыв юрютелер. Буланы токътагъан ерин гьызарлап аян этме бажаргъан душман топлар булан урма башлай. Шо ерге ювукъда атылгъан топну яркъычлары Алини санларына да бата. Мариуполь санчастда яраларын бакъгъан сонг ону Ростовдагъы, сонг Сызраньдагъы госпиталларда къолайгъа къайтаралар. Заманлыкъгъа асгерде къуллукъ этме болмай деп гьисап этип огъар бир ай отпуска да берелер.
Оьрде эсгерилген къоччакъ ишлери учун Али Телекъаев Россияны Президенти В.В.Путинни Буйругъу булан 2022-нчи йылны 4-нчю апрелинде «Къоччакълыгъы учун» деген медаль булан савгъатлангъан. 2022-нчи йылны 15-нчи декабринде буса огъар Россияны оборона Министерлигини буйругъуна гёре «Давда оьзюн айрыча гёрсетгенлиги учун» деген медаль да тапшурула. Ону тёшюн, 2018-нчи йылда берилген «Темиркъазыкъ Кавказда къуллукъ этгени учун» деген медаль да безей.
Бугюнлерде Али оьзюне берилген отпусканы болжалындан пайдаланып, абзар-уьюн де жыйышдырып, тезден гёзю тюшген, юреги ушатагъан къыз булан уьйленип, татывлу агьлю къурмакъны гьайын этип айлана. Озокъда, бу гьаракатында огъар агъасы Валини де кёп кёмеги тие. Гелигиз, биз де ана Ватаныбызны инамлы якълавчуларына давдан-шавдан эсен-аман къутулуп гьар гюнлюк яшавунда парахатлыкъ, насип ва арты уьзюлмес яхшылыкълар ёрайыкълар.
