Дагъыстан – бизин уллу ва эркин Ватаныбызда тюрлю-тюрлю тиллерде сёйлейген миллетлер дос агьлюде йимик татывлукъда, яшавлукъ этип турагъан ажайып тамаша ер. Дагъыстанны халкълары оьзлер башдан гечирген нечесе юз йылланы боюнда Россия пачалыгъына гьалал ва гьакъ кюйде къуллукъ этегенин сёз булан да, ишлери булан да тасдыкъ эте гелгенлер. Бугюнлерде де дагъыс­танлы уланлар, къызлар минглер булан Украинада бойда юрюлюп турагъан хас дав гьаракатларда къанын-жанын аямай дегенлей, къоччакълыкъ гёрсетип къуллукъ этелер.

Капиркъумукълу 25 йыллыкъ младший лейтенант Атаев Хизри Абдурагьманович – шо дав гьаракатда ортакъчылыкъ этеген биринчи гюнюнден башлап, оьзюн арслан уланлардай оьр тутуп, айрыча игитлик гёрсетме бажаргъанланы бириси.

Украина булан дазуну ювукъ боюнда  асгер къуллугъун кютюп турагъан  Хизри феврал айны 24-нчю гюнюнде, оьзлени бёлюгю душманны санавгъа кёп асгерлерине къаршы туруп,  тас этивлеге тарыгъан деген къувунлу хабарны эшитип, оьзюн алма-салма ер тапмай  айлана. Ол не амал этип де, батальондагъы асгер ёлдашларыны янына етишип, олагъа  болагъан кёмегимни этмей къоймасман деп токъташа ва командирлер булан да гьакълашып, тенгсиз ябушув юрюлген бойгъа тербене. Булар бир-нече ёлдаш булан Камаз машинлеге де минип, башлап Мелитополь шагьаргъа, ондан сонг буса Васильевка юртгъа ерли баралар.Онда Хизри оьзю къуллукъ этеген батальонда техникагъа жавап береген ёлдашы булан бирге Запорож областны ювугъунда, Ореховка юртдагъы фермада къамалгъан ёлдашларыны янына алгъасай. Арадан онча кёп заман гетмей, миллетчилер  бизин солдатлар ерлешген ерни токъташдыра да, бары да дав савутлардан атышыв юрютмеге гирише.

– Шо гючлю атышывну натижасында бизин асгер бёлюкдеги радиостанцияны начальниги авур яралангъанны гёрюп,  чалтлыкъда ону уьстюне етишип, гётерип алып къоркъунчсуз ерге чыгъарма къарадым. Тек не амал этерсен, ону санитарлагъа тапшуруп, башлапгъы кёмегибизни этип битгинче, ол мени къолумда жан берди, – деп кюстюндю Хизри.

– Май айны 12-нчи гюнюнде Камаз машинге ашамлыкъ сурсат, дав савутлар да юклеп, бизин позициялагъа етишдирме ювукъ болуп турагъанда, машинимни дёгерчеги  минагъа басылып къалып, янымда олтургъан эки де ёлдашымны ал терезени де чачыратып къыргъа ташлагъан. Эс тапгъанда олар мени авлакъдан излеме башлагъанлар. Рамазан  Къалабеков ахырда да мени минадан атылгъан машинни дырбайып ачылгъан эшигинде салланып тапгъан. Авур яралангъанымны гёрюп, асталыкъ булан элтип санчастгъа тапшурма бажаргъанлар. Арадан ярым сагьатлар гетип, мени Васильевкагъа, ондан сонг да вертолёт булан Севастопольдагъы госпитальгъа элтгенлер. Уьч гюнден сонг шонда башлап эсге де гелгенмен. Дагъы да он гюнлер гетип, мени самолёт булан Москвагъа А.А.Вишневскийни атындагъы госпитальгъа бакъдыралар. Санларымда яра тиймеген, сынмагъан ерим къалмагъан. Врачлар авур яра тийген бутумну гесип тайдырып, темир протез салгъанлар, яраларымны бакъгъанлар, – деп эсге ала Хизри Атаев башдан гечирген авур мюгьлетлени.

– Хизри яш чагъындан тутуп да асгерде къуллукъ этлиме, Ватанны якълавчусу болуп чалышма сюегенин бир де яшырмагъан. Спорт­ну гьар тюрлю журалары булан машгъул болгъан, яхшы охуп билимлер алгъан. Ол Ватаныбызны герти патриоту ва инамлы якълавчусу, –  деп хабарлай асгер ёлдашыны, юртлусуну гьакъында Украинада юрюлюп турагъан дав гьаракатларда яраланып, авур операциялагъа тюшюп къайтгъан ва «Къоччакълыгъы учун» деген медал булан савгъатлангъан Илмутдин Аскеров. – Асгер къуллукъдан авур яралар тийип къайтса да, бу къоччакъ улан къуллукъ этивюн буссагьатда да ким-ким де сукъланардай уьлгюлю кюйде узатып юрюй.

Бизин юртлу улан Атаев Хизри Абдурагьмановичге ана Ватанны якълай туруп гёрсетген къоччакълыгъы учун Россияны Президенти В.В.Путинни Указы булан бир-нече медаллар берииген. Оланы арасында «Асгер макътавлугъу учун»деген 2-нчи даражалы, Жуковну атындагъы ва «Къоччакълыгъы учун» деген 2-нчи даражалы медаллар бар. Ол Буйнакск районну военный комиссариатына ишге де алынгъан.

Саламатлыгъы бетине чыгъып турагъан къоччакъ улан Хизри Атаев оьзю айтагъангъа гёре, бизин яшавда инг багьалы гьисаплана­гъан савгъатлар тюгюл, сав болуп, агьлюнгню, дос-къардашынгны сююндюрюп, татывлукъда-татлиликде яшамакъдыр.

 

Казим КАЗИМОВ.

СУРАТДА: Къоччакъ улан Хизри Атаев агьлюсю булан.