Алдан берли юрт хозяйство тармакъда ишлейген ашлыкъ болдурувчулар абурлу ва сыйлы касбуну адамлары деп санала гелген. Шоланы арасында трактор гьайдавчулар айрокъда макътавгъа лайыкълы деме ярай. Неге десегиз, тангны ярыгъындан ахшам къашкъаралгъанча, янгургъа, яллавгъа къарамайлы, авлакъда ишде болалар. Оланы къайратлы загьматына гёре ана топуракъ ашлыгъын да къызгъанмай.

 

Адам оьз къысматында ерин тапмакъ, биринчилей, бир саниятны устасы болмакъдыр. Бабаюртлу Гьюсейин Арсланалиевге тракторист касбу яшавуну кюрчюсю болуп токътагъан. Эдепли, загьматны кёп сюеген, яллыкъ излемейген ол бир де этген иши булан макътанмагъан.

Гьюсейин Арсланалиев 1954-нчю йыл Бабаюртда колхозчу Умавну агьлюсюнде тувгъан. Авлетлерине де гиччиден тутуп загьматгъа сюювню сингдирген.

Юртда 8 класны битдирип, ол 1969-нчу йылда Бабаюртдагъы юрт хозяйство хозяйство училищеге охума геле. 1970- нчи йылда ону тамамлап, Гьюсейин Арсланалиев Бабаюртдагъы «Дагъыстан» совхозгъа тракторист болуп тюше. Загьмат ёлуну биринчи гюнюнден тутуп, ол оьзюню ишин бек ушата, намуслу кюйде чалыша. Онда ишлеп турагъан вакътисинде Гь. Арсланалиевни асгерге чакъыра. Ол 1973-1975-нчи йылларда асгерде къуллукъ эте.

1977-нчи йылда Гьюсейин Умавович совхоздан тайып, «Юрт хозяйство техника» деген къурумгъа «К-700» тракторну гьайдавчусу болуп геле. Эсгерилген къурумлар бузулуп башлагъан­да, 1993-нчю йылда Гьюсейин Бабаюртдагъы ёл ремонт къурулуш управлениеге ишге чыгъа. Шондан таба пенсиягъа да гете. Амма ол уьйде олтуруп турмай. Буссагьатгъы вакътиде де Гьюсейин эсгерилген къурумда къаравулчу болуп ишлей. Ол къайсы коллективде де иш ёлдашларыны арасында абур-сый къазангъан.

Гь. Арсланалиев тёкген къыйынлар гьар заман­да да белгиленген. Огъар район ва рес­публика оьлчевюнде кёп санавда гьюрметлев грамоталар тапшурулгъан, акъча савгъатлар да берилген, социалист загьматны уьлгюлюсю деп сураты да илинген.

Гьюсейинни яшав ёлунда иш уьстюнде къаттылыгъын, ана топурагъына аминлигин аз сынамагъан. Не болса да, ол оьзюню кёп сюеген касбусунда къайратлы загьмат тёкгенге бир де гьёкюнмеген. Герти айтыла экен адам оьзю кёп сюеген ишинде ишлесе, арыгъанлыкъны гьис этмей деп. Шо кююнде Гьюсейин Арсланалиев де гечелер ай ярыкъда чалышса да, талгъанлыкъ не экенни билмеген.

Айтылгъан загьматчыдан къайры да, Гьюсейин – абурлу ата ва уллата. Ол 1976-нчы йылда къазмалы Умукюрсюн булан уьйленген, 2 къыз ва 2 уланны тарбиялап, тюз ёллагъа салгъан. Авлетлери де яшавда оьз ерин табып, ожакъ къургъанлар. Оланы яшлары тарбиялы болмакълыгъы­ны себеби – ата-анасындан гелген варислик. Гьюсейин­ни яшлары, оланы авлетлери,  олардан тувгъанлары да ону эпсиз бек сюелер ва олай гьюрметли атасы баргъа оьктем болалар.

 

Гёзел ГЬАСАНОВА,

Бабаюрт.

СУРАТДА: Гьюсейин – агьлюсю Умукюрсюн булан.