Адил Янгыюртда башлапгъы школа къурулгъанлы, 150 йыллар бола. Тарихни терен къатлавларында тамур ташлагъан школабызны алаша посагъасындан нечесе наслулар чыкъгъан, нечесе охувчулар яшавну шагьра ёлунда оьз гьызын къойгъан. Оланы барысын да санамагъа да бажарылмай.
Башлапгъы вакътилерден тутуп, бугюнлеге етишгенче школаны гёрюнюшю ону ичинде загьмат тёгеген муаллимлер булан байлавлу. Оьзлени билими, къатты талаплары, насигьатлары булан муаллимлер школаны бай эте, охувчуланы тюз ёллагъа тюшмеге иштагьландыра. Школаны битгенли арадан 25 йыллар гетген. Бир вакътини ичинде клас ёлбашчыбыз болуп тургъан, артдагъы 28 йылны боюнда школаны ёлбашчысыны охув ишлеге къарайгъан заместители Садина Мусаевна АТАЕВА – шолай муаллимлени бириси.

Садина Атаева 1969-нчу йылда Адил Янгыюртда Мусаны ва Рабиятны агьлюсюнде тувгъан. 1974-нчю йылда 5 йыллыкъ Садина юрт школаны 1-нчи класына бара. Ерли школада охуй­гъан йылларда да, чагъына гёре ол тенглилеринден гиччи буса да, билим якъдан олардан артда къалмай, некъадар, кёбюсю гезиклерде озма да оза. 1985-нчи йылда юрт школаны яхшы къыйматлагъа тамамлап, Садина Атаева Дагъыстан пачалыкъ педагогика институтну физика-математика бёлюгюне тюше. Оьр билимге ес болгъан сонг, ол 1990-нчы йылда юртуна къайта ва оьзюн яшавну генг сокъмагъына чыгъаргъан анадаш школасында муаллим гьисапда ишлеме башлай. Башлап ол школада физика дарсланы юрюте ва пионервожатый болуп чалыша.

1993-94-нчю йылларда бизин класгъа да ол ёлбашчылыкъ этди. Ол юрютеген дарсларда буса ону кёмек­лиги булан гьар гюнлюк яшавда ёлугъагъан физика гьаллагъа тюшюндюк, электрик токну гючюн билдик.

Муаллимден къайры да, Садина Атаева бажарывлу тарбиялавчу да дюр эди. Ол гьар танапусда класда бола эди, яшлар булан гьакълашып, оланы къыйынын-дертин билмеге, тарыкъда кёмек этмеге къасткъыла эди. Охувчуларыны тарбиясына чы нечик де, гийимине де тергев бере, тарыкъ ерде уруша, англата. Бизин эсибизде Садина Атаева тап шо келпетде сакълангъан.

Сонг ол школаны ёлбашчысыны охув ишлеге къарайгъан заместители болду, бизге буса физика дарслардан муаллим гьисапда 11 класны битдирме кёмек этди. Ону дарслары тамаша тез гете, гьар яш физиканы теренине гирмеге, билимин камиллешдирмеге къаст эте эди.
11 класны битегенде биз кёп сююп физика дарсдан экзаменни сайладыкъ. Шо дарс бизге шолай ювукъ болгъангъа, озокъда, Садина Атаеваны къастлыгъы бар эди. Экзаменни алдында Садина Мусаевна мени шондан эркин этегенни билдирди ва оьзюне кёмекчи этип белгилемеге сюегенни айтды. Клас ёлдашларым бары да экзаменлер берип де чыкъдылар. Гьакъыкъатда менден буса айрыча экзамен алынды. Шо экзаменге школада физика-математика дарсланы юрютеген бары да муаллимлер жыйылдылар. Янгылышмадым, гьар жавабымны муаллимим англатгъан кюйде айтдым, ону абурун ер этмедим. Озокъда, шо бары да – эсделик. Гьар гезик Садина Мусаевнаны гёрсем, гьалиден 25 йыл алда болгъан шо ахырынчы экзаменим эсиме геле. Магъа шо терен билимни бермеге болгъан муаллимим булан оьктем боламан.
Садина Атаева буса гьали де оьзюню алдына салынгъан борчланы уьстюнлю кюйде кюте. Ону иш ёлдашлары ва охувчулар абурлайлар, оланы къыйынына кёмекчи, яхшылы­гъында буса герти къурдаш гьисапда табыла.

Охувчуланы тарбиялавда етишген уьстюн­люклери учун Садина Атаева районну ва республиканы янындан кёп керенлер савгъатлангъан. Гетген йыл Садина Мусаевнагъа «Россия Федерациясыны билим беривюню ва тарбиялавуну гьюрметли къуллукъчусу» деген ат берилди ва белги тапшурулду.

Садина Атаева сююмлю ана ва уллана да дюр. Агьлюсю Алевдин булан ол 2 яшын тарбиялагъан. Олар да, оьр билимлеге ес болуп, гьариси оьзлер танглагъан касбуда загьмат тёгелер.