Дагъыстан оьзюню тав, тавтюп ва тюзлюк бойдагъы табиат, топуракъ ва сув байлыкълары булан танывлу. Ерли шартларда кёп къадардагъы оьсюмлюклени, къуруда ва сувда яшайгъан жанланы башгъа-башгъа журалары амалгъа гелген.
Къыт болгъан жураларыны аманлыгъын къоруп сакъламакъ учун олар гьар тюрлю оьлчевдеги Къызыл китаплагъа гийирилген. Айтмагъа сюегенибиз, бизин республикабызгъа ял алмагъа ва билимлерин генглешдирмеге къонакълай гелеген туристлер де аслу гьалда сыйлы табиат эсделиклерибиз ерлешген бойларда – пачалыкъ къорукъларда, заповедниклерде, милли паркларда кёп бола барагъаны тергевню тарта.
«Дагъыстан» деген айрыча къорулагъан пачалыкъ заповедникни умуми майданлары 20 минг гектарланы бийлеген. Заповедникни дазуларыны ичинде ерлешген «Къызлар къолтукъ» ва шолай да «Сарихум къайыр тёбе» лап да гёрмеклилери санала.
Россияны табиат байлыкъларыны ва экология министерлигини сиптечилиги булан гьар йыл бизин уьлкебизде айрыча къорулагъан бойларда болгъан туристлени санаву аянлашдырыла.
Умуми кюйде алгъанда, савлай Россияны айрыча къорулагъан бойларында 14, 5 миллион туристлер болгъан. Оьтген йылны натижалары булан тенглешдиргенде айрыча къорулагъан ерлерде болагъан туристлени санаву 500 минге артгъан.
Белгили болгъаны йимик, милли паркланы арасында Ставропол крайдагъы «Кисловодск» деген милли паркда лап да кёп туристлер болгъан, оланы санаву 5 миллионгъа етишген.
Краснодар крайны, Къарачай-Чергес ва Адыгей республикаланы топуракъларын бийлеген «Кавказ» заповедникде алдагъы йылларда йимик бу гезик де туристлени санаву артса тюгюл, кем болмады.
2023-нчю йылда «Дагъыстан» заповедникде болгъан туристлени санаву 270 мингден айлангъан. Шо да савлай Россия оьлчевюнде алгъанда уьстде эсгерилген заповедникден сонг экинчи ерде.
Гележекде де «Дагъыстан» деген пачалыкъ заповедникни бизин рес-публикабызгъа къонакълай гелеген туристлени отавуна айландырмакъ учун гьар тюрлю онгайлы къуллукъланы болдурувгъа айрыча тергев берилежек.
Артып тербейген талапланы гьисапгъа алып, «Дагъыстанны 100 аламаты» деген турист маршрутда къурулуш ишлер давам этилине, туристлер учун ял алмагъа онгайлы шартлар яратылына.
Шолайлыкъда, янгы иш ерлер ачылагъаны ва пайдаландырылагъаны ачыкъ болуп гёрюне.
Къ. КЪАЗАКЪМУРЗАЕВ.
СУРАТДА: Туристлер аламны аламаты “Сарихум къайыр тёбеде”.
